युक्रेनको माटोले विश्वको करिब पाँच प्रतिशत खनिज स्रोत ओगटेको भए पनि तीमध्ये धेरैजसो अझै दोहन हुन सकेका छैनन् । विश्व माइनिङ डाटाको २०२४ संस्करण अनुसार युक्रेन ४०औँ ठूलो खनिज उत्पादक देश हो भने सन् २०२२ मा फलाम उत्पादनमा विश्वकै १०औँ स्थानमा थियो ।

फ्रान्सको ब्युरो अफ जियोलोजिकल एन्ड माइनिङ रिसर्च (बिआरजिएम) लगायतका भू–वैज्ञानिकहरूले सन् २०२३ मा गरेको अध्ययनमा युक्रेनमा फलाम, म्याङ्गनिज, युरेनियमसहित सयभन्दा बढी स्रोतहरू फेला पारेका छन् ।

युक्रेन म्याङ्गनिज (८औँ), टाइटेनियम (११औँ) र ग्रेफाइट (१४औँ) को उल्लेखनीय उत्पादक देश हो। युरोपेली आयोगले युक्रेनलाई टाइटेनियमको महत्त्वपूर्ण आपूर्तिकर्ता र २० भन्दा बढी कच्चा मालको सम्भावित स्रोत मानेको छ ।

दुर्लभ पृथ्वी तत्वमा सम्भावना तर चुनौती पनि
दुर्लभ पृथ्वी तत्वहरू (आरइई) मा युक्रेनसँग महत्त्वपूर्ण स्रोतहरू छन्, तर अझै उत्खनन भएको छैन। युक्रेनी सरकारले छ वटा भण्डारमा आरइई रहेको जनाए पनि उत्खननका लागि ठूलो लगानी आवश्यक छ । नोभोपोल्टाभस्के भण्डारको विकासका लागि मात्रै ३० करोड डलर लगानी आवश्यक परेको बताइएको छ ।

यद्यपि रेटिङ एजेन्सी एस एन्ड पीले युक्रेनका भण्डारबारेको केही अनुमान पुराना मूल्याङ्कनमा आधारित रहेको र उत्खनन प्राविधिक रूपमा चुनौतीपूर्ण हुनसक्ने जनाएको छ ।

यसैबीच, अमेरिकी राष्ट्रपति डोनाल्ड ट्रम्पले युक्रेनसँगको सहायताको बदलामा दुर्लभ पृथ्वी तत्वहरूको पहुँच खोजेको बताएका छन् ।

युक्रेनसँग युरोपको ठूलो लिथियम भण्डार रहे पनि अहिलेसम्म उत्खनन सुरु भएको छैन ।