गत वर्षको राष्ट्रिय निर्वाचनमा व्यापक धाँधली भएको आरोप लगाउँदै प्रतिवेदन लेख्ने एक एनजिओ प्रमुखको घर पाकिस्तानी अधिकारीहरूले सिल गरेको उनले शनिबार एएफपीलाई बताएका छन् ।

सन् २०२४ फेब्रुअरीको निर्वाचन देशका सबैभन्दा लोकप्रिय राजनीतिज्ञ इमरान खान जेलमा रहेको र चुनाव लड्न प्रतिबन्धित भएको अवस्थामा भएको थियो र शक्तिशाली सेनासँग नजिक मानिने दलहरूको गठबन्धनले सत्ता हासिल गरेको थियो  ।

यस महिना एनजिओ पट्टनले निर्वाचनबारे एक प्रतिवेदन प्रकाशित गर्‍यो र एक वक्तव्यमा यसलाई ‘अभूतपूर्व रूपमा धाँधली भएको’ र ‘मतदान धाँधली, जालसाजी र हेरफेर’ भएको बताएको थियो । 

हाल लन्डनमा रहेका पट्टनका प्रमुख सरवर बारीले राजधानी इस्लामाबादमा रहेको आफ्नो घर शुक्रबार राति सिल गरिएको बताउनुभयो । “यो स्पष्ट रूपमा प्रतिवेदनको प्रतिक्रियामा गरिएको हो”, उनले एएफपीलाई बताएका छन् । 

उनकी श्रीमती आलिया बानोले प्रहरी अधिकारी, मजिस्ट्रेट र इस्लामाबाद प्रशासनका अधिकारीहरूसहित करिब दुई दर्जनको टोलीले सम्पत्ति सिल गरेको बताएएकी छन् । एएफपीले देखेको निवासलाई सिल गर्ने न्यायाधीशको आदेशमा पट्टनको एनजिओको रूपमा दर्ता २०१९ मा रद्द गरिएको र यो गैरकानूनी रूपमा सञ्चालन भइरहेको उल्लेख गरिएको थियो । 

बारीले आफ्नो निवासलाई प्रायः पट्टनका बैठक र पत्राचारका लागि प्रयोग गर्ने गरेको तर यो मुख्यतया आफ्नो घर भएको कुरामा जोड दिए । पाकिस्तान मानव अधिकार आयोगले सामाजिक सञ्जाल प्लेटफर्म एक्समा जारी एक वक्तव्यमा उहाँको घर सिल गरिएको समाचारप्रति ‘चिन्तित’ भएको जनाएको छ । 

“नागरिकहरूविरुद्ध यस्ता धम्कीपूर्ण रणनीतिहरू अस्वीकार्य छन्”, वक्तव्यमा भनिएको छ, “यो मामिलाको तत्काल अदालतमा सुनुवाइ हुनुपर्छ ।”  पट्टनले सन् २०२४ फेब्रुअरी ८ मा भएको राष्ट्रिय निर्वाचनको सार्वजनिक छानबिनको माग गरेको छ । 

मतदानअघि पूर्व प्रधानमन्त्री खानको पार्टीलाई व्यापक दमनद्वारा लक्षित गरिएको थियो । यस क्रममा धेरै वरिष्ठ नेताहरू पक्राउ परेका थिए र उनीहरूको सडक अभियान अवरुद्ध भएको थियो ।  मतदानको केही दिनअघि खानलाई भ्रष्टाचार, राजद्रोह र अवैध विवाह लगायतका तीनवटा अपराधमा दोषी ठहर गरिएको थियो । 

मतदानको दिन मोबाइल इन्टरनेट बन्द गरिएको थियो । यसलाई इस्लामाबादले सुरक्षा चिन्ताहरू समाधान गर्न आवश्यक भएको बताएको थियो । सामाजिक सञ्जाल प्लेटफर्म एक्स मतदानपछि धाँधलीका आरोपहरू सार्वजनिक गर्न प्रयोग गरिएपछि प्रतिबन्धित छ । 

अवरोधहरूका बाबजुद खानप्रति वफादार उम्मेदवारहरूले अन्य कुनै पनि पार्टीभन्दा बढी सिट जिते तर सेनाका मित्र मानिने दुई पूर्व प्रतिद्वन्द्वी दलको नेतृत्वमा रहेको गठबन्धनले उनीहरूलाई सत्ताबाट बाहिर राख्यो । विश्लेषकहरूका अनुसार पाकिस्तानको सेनाले कयौँ दशकसम्म देशमा प्रत्यक्ष शासन गरेको छ र नागरिक राजनीतिमा अझै पनि ठूलो शक्ति कायम राखेको छ ।