अमेरिकी राष्ट्रपति डोनाल्ड ट्रम्प र युक्रेनका राष्ट्रपति जेलेनेस्कीको हिजोको भेटमा ट्रम्पका अगाडी जेलेनेस्कीले भोग्नु परेको अपमान, उनिहरुले संवाद गरिरहेको भिडियोको अहिले विश्वभरि चर्चाको विषय भएको छ । 

अधिवक्ता विमल पोखरेलले भने युक्रेनका राष्ट्रपति जेलेनेस्की र नेपालका पाका  कम्युनिष्ट नेता मोहनविक्रम सिंहको राजनीतिक शैलीमा समानता रहेको भन्दैं कडा टिप्पणी गरेका छन् । उनले सामाजिक सञ्जाल फेसबुकमा लेख्दै, भने

मलाई भ्लादिमिर जेलेनेस्की र मोहनविक्रम सिंह दुवैको राजनीतिक बुद्धि उल्टो लाग्छ । खासमा जेलेनेस्की सफल कलाकार र मोहनविक्रम सिंह सफल साहित्यकार हो । राजनीतिमा भने दुवैको बुद्धि पूरै उल्टो । मैले आरोप लगाएको होइन, परिणामले त्यही देखाउँछ । कसैले वास्तविक परिणामलाई अस्वीकार गर्छ भने त्यसलाई मोतिविन्दू लागेको छ भनेर बुझे हुन्छ ।

जेलेनेस्की र सिंह दुवैको राजनीति उल्टो र झुर छ । जेलेनेस्कीले आफ्नै छिमेकी रुससँग बेकारमा निहुँ खोजेर अमेरिका जस्तो पराइको उक्साहटमा लाग्दा आफ्नै देशका झण्डै पचासौं हजारको मृत्यु, लाखौं विस्थापित, खरबौको क्षति भइसकेपछि अहिले अमेरिकी अपमान व्यहोर्नुपरेको छ र पूरै पराजित हुनुपरेको छ ।

मोहनविक्रम सिंहले पनि आफ्ना इमानदार नेता, कार्यकर्ता, जसले दशकौंदेखि यही पार्टीमा रगतपसिना बगाए, तिनीहरूलाई सामान्य मतभेदको आधारमा भुत्ल्याएर, पखेटा निकालिदिएर, लखेटेर, यति सम्म कि आफ्नै पार्टीका सांसद कृष्ण थापालाई मिल्क्याएर कांग्रेसको सरकार बनाइदिनुभयो । त्यही कांग्रेसले चुनावमा मसाललाई चिलिम फर्काइदियो । अझै वक्तव्यबाजी गरेर मैले ठीक गरें भन्दै हुनुहुन्छ ।

बारम्बारको फुट, विभाजन, इमानदार नेताकार्यकर्तालाई लखेटेपछि आफ्नो पार्टी मसानघाटमा पुगेको थाहा छैन, बेकारका घमण्ड । आफ्नालाई दुश्मनको व्यवहार गरेर पराइको गोटी बनेपछि यो भन्दा धेरै हुन सक्दैन थियो, कमरेड । तपाईंको घमण्ड, मुर्दा अनुशासन, भूमिगतको नौटंकी (आज पोखराको लिटरेचर फेस्टिभलमा भूमिगतको बर्को उघार्दै हुनुहुन्छ क्यारे), कांग्रेससँगको साँठगाँठबाट पार्टी पुग्ने भनेको मसानघाटमै हो । बाँकी विषय छलफल गर्दै गरौंला !