सुदूरपश्चिम प्रदेशमा आज शनिबारदेखि गौरा पर्व सुरु भएको छ। यो पर्व सुदूरपश्चिमका ९ वटै जिल्लामा भव्यताका साथ मनाइन्छ । पर्वको पहिलो दिन आज घरघरमा बिरुडा भिजाइँदैछ। बिरुडा गहत, गुराउस, केराउ, मास र गहुँ मिसाएर तयार गरिन्छ। यो पर्व पहिले पहाडी क्षेत्रमा मात्र मनाइने भए पनि पछिल्लो समय तराईमा समेत लोकप्रिय बन्दै गएको छ।
गौरा पर्वमा शिव र पार्वतीको पूजा गरिन्छ। महिलाहरूले विशेष व्रत बस्ने र पूजा गर्ने गर्छन्। यस अवसरमा धार्मिक गीत गाउने र देउडा जस्ता परम्परागत नृत्य गर्ने चलन छ । संस्कृतिविद्हरूका अनुसार यो पर्वको धार्मिक र सांस्कृतिक महत्त्व छ। यसले पारिवारिक सुख र सौभाग्य प्राप्त हुने विश्वास गरिन्छ।
गौरा पर्वको अवसरमा विदेशमा काम गर्ने धेरै सुदूरपश्चिमेलीहरू घर फर्किने क्रम सुरु भएको छ। यसले परिवार र समुदायबीच एकता र सद्भाव बढाउने गर्छ । पर्व ५ दिनसम्म चल्नेछ र यस अवधिमा विभिन्न धार्मिक तथा सांस्कृतिक कार्यक्रमहरू आयोजना गरिनेछन्।
तपाईको प्रतिक्रिया दिनुहोस