काठमाडौं । तत्कालीन माओवादीको नेतृत्वमा भएको १० वर्षे सशस्त्र द्वन्द्वका एक कमाण्डर नेत्रविक्रम चन्द ‘विप्लव’ सी कृषि उत्पादनमा लागेका छन् । 

माओवादी शान्ति वार्ता र मूलधारको राजनीतिमा आए पनि विप्लव उहीँ पुरानै द्वन्द्वको झल्को दिनेगरी गाउँदेखि शहरसम्म नेकपाको संगठन निर्माण गरिरहेका थिए । 

तर, उनी पनि केही वर्ष पहिले मूलधारको राजनीतिमा आएका छन् । विप्लव मूलधारको राजनीतिमा आएसँगै कृषिमा केन्द्रित भएका छन् । उनी अहिले देशका विभिन्न ठाउँमा हावापानी सुहाउँदो फलफूल रोपिरहेका छन् । 

यतिबेला विप्लव अर्घाखाँचीको शीतगंगामा अकबरे खुर्सानी रोपिरहेका छन् ।  कृषि जनकम्युनका महासचिव विप्लवले १५ जना कार्यकर्तासहितको टोलील अकबरे खुर्सानी रोपिरहेको नेकपा निकट क्रान्तिकारी पत्रकार संगठनका अध्यक्ष प्रकाश डुम्रेले जानकारी दिए । 

सामूहिक व्यावसायिक कृषि उत्पादन आत्मनिर्भरताका लागि अनिवार्य भएको विप्लवको भनाइ उद्धृत गर्दै उनले बताए । यसअघि जुम्ला पुगेर विप्लले स्याउका विरुवा रोपेका थिए भने उनले देशैभर कृषि उत्पादनमा आफ्ना कार्यकर्तालाई जोडिरहेका छन् । 

केही दिन अगाडि कालीकोट पुगेर उनले भेडा फर्मको पनि उद्घाटन गरेका थिए । उनी काठमाडौंभन्दा आफ्नो गृहजिल्ला कपिलवस्तु केन्द्रित छन् । त्यहाँ नेकपाले कयौँ बिघाहा खेतमा धानखेती गरिरहेको छ । 

नेकपाले सामुहिक कम्युनको स्थापना गरेर व्यवसायिक कृषि उत्पादनतर्फ जोड दिएको छ । व्यवसायी कृषि उत्पादनमा लागेका उनका कार्यकर्ता पनि आत्मनिर्भर उन्मुख भएको पत्रकार डुम्रे बताउँछन् । 

विप्लव सामाजवादी मोर्चाका संयोजक पनि हुन् । उक्त मोर्चामा नेकपा (माओवादी केन्द्र), एकीकृत समाजवादी मोर्चा, नेपाल समाजवादी पार्टी र नेकपामा आवद्ध छन् ।