काठमाडौं । प्रतिनिधिसभाका सभामुख देवराज घिमिरेले राष्ट्रिय स्वतन्त्र पार्टी (रास्वपा)का सभापति रवि लामिछानेको निलम्बित सांसद पद फुकुवा गर्न नसकिने बताएका छन् । 

सभामुख घिमिरेले रविको निलम्बित सांसद पद फुकुवा गर्ने अधिकार आफूसँग नभएको सभामुखका प्रेस विज्ञ शेखर अधिकारीले जानकारी दिए ।

सभामुखको भनाइ उद्धृत गर्दै अधिकारीले भने, ‘सांसद पद सभामुखको हैसियतले मैले निलम्बन गरेको होइन । मैले सूचनामात्रै जारी गरेको हो । कानुनले सम्पत्ति शुद्धीकरण मुद्दा दायर भएपछि निलम्बन हुने व्यवस्था गरेको छ । मैले निलम्बन फुकुवा गर्न सक्दिनँ । मबाट असम्भव छ ।’

सभामुखको भनाइअनुसार रविको संसद् यात्रा पुनः अनिश्चित बन्ने पक्का छ । आफ्नो निलम्बित सांसद पद फुकुवा गर्ने आग्रहसहित आज बिहान रविले सभामुखबीच भेटवार्ता भएको थियो ।