काठमाडौं । सामाजिक संस्था टिम नेपोेद्वारा कारागारलाई विभिन्न विधाका पुस्तक हस्तान्तरण गरेको छ । जिल्ला कारागार धादिङलाई पाँच सय १५ थान पुस्तक हस्तान्तरण गरेको नेपोले जनाएको छ । 

नेपोका अनुसार कारागारमा वर्षौँ पहिलेदेखि सजाय भोगिरहेका कैदी–बन्दीको पठन संस्कतिको विकास गर्न पुस्तक हस्तान्तरण गरिएको हो । वितरण गरिएका पुस्तकहरूको पठनले उनीहरूको मानसिक स्वास्थ्यमा सुधार ल्याउन र समाजमा पुनःस्थापित हुन टेवा पुग्ने उसको अपेक्षा गरिएको छ । 

पुस्तक वितरण कार्यक्रममा टिम नेपोका अध्यक्ष प्रदीप गिरीले कारागार कार्यालय धादिङका प्रमुख राममणि मिश्रलाई विभिन्न विधाका पुस्तक हस्तान्तरण गरेका हुन् ।

‘पुस्तक परियोजनाले कैदी–बन्दीहरूलाई पुनस्र्थापना र आत्मसुधारको अवसर प्रदान गर्नेछ,’ गिरीले भने, ‘पुस्तकको सही सदुपयोग गर्दै उनीहरूबीच आपसी पठन संस्कृतिको विकास गर्ने यस परियोजनाको लक्ष्य रहेको छ ।

उनले पढाइले नयाँ अवसर र परिवर्तनको ढोका खोल्ने बताए । आगामी दिनमा धादिङ बाहेकका अन्य जिल्लामा पनि यो परियोजनामार्फत पुस्तक हस्तान्तरण गरिने अध्यक्ष गिरीले प्रतिवद्धता गरे । 

पुस्तक हस्तान्तरण कार्यक्रममा प्रमुख जिल्ला अधिकारी धादिङका सुमन घिमिरेले टिम नेपो को यो अभियान कारागार सुधारको उत्कृष्ट पहल भएको बताएका छन् । उनले पुस्तकले  कैदी–बन्दीहरूको जीवन परिवर्तन र सकारात्मक सोचको विकास गर्ने विश्वास व्यक्त गरेका छन् । 

त्यस्तै प्रहरी उपरीक्षक दीपेन्द्र शाहीले पनि परियोजनाको प्रशंसा गर्दै शिक्षा र पठन संस्कृतिको प्रवर्द्धनले कैदी–बन्दीहरूको मानसिक स्वास्थ्यमा सुधार ल्याउने र समाजमा पुनस्र्थापना हुन सहज बनाउने बताएका थिए ।

सामाजिक संस्था ‘नेपो’ को सहकार्यमा सम्पन्न उक्त कार्यक्रममा नेपोका कार्यकारी सदस्य प्रवेश पण्डित, टिम नेपो काठमाडौंका संयोजक निराजन अधिकारी, सदस्य एलिश धरेल, किरण ओली र पारश क्षेत्री पनि उपस्थित थिए।

यसअघि "नेपो" ले अर्घाखाँची, स्याङ्जा, तनहुँ, अछाम, चितवन, दाङ, रसुवा, लमजुङ र काभ्रे जिल्लाका कारागारमा पुस्तकहरू हस्तान्तरण गर्नुका साथै पुस्तकालय पनि स्थापना गरेको छ भने धादिङ कारागारमा पनि पुस्तकालय स्थापना गरिएको छ । 

यो सँगै नेपोले १० वटा जिल्ला कारागारमा पुस्तकालय स्थापना गरेको छ ।