काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेले पूर्वराजा र उनका समर्थकप्रति नाजबाफ देखिएका छन् ।

सहकारी ठगी प्रकरणमा काठमाडौं जिल्ला अदालतको आदेशविरुद्ध उच्च अदालत पाटन पुगेका रविले सञ्चारकर्मीहरूसँग कुरा गर्दै सत्तारूढ दलहरूप्रति आक्रोश व्यक्त गरेका थिए ।

कांग्रेस–एमालेले आफूमाथि प्रतिशोध साधेको भन्दै क्रान्तिका लागि तयार रहन चेतावनी दिएका छन् । 

तर, राजावादीहरूको गतिविधिलाई के भन्नुहुन्छ ? भनेर सोधिएको प्रश्नमा उनी नाजबाफ देखिएका थिए । 

‘मैले बोल्ने समय नजिक आउँदैछ । अहिले नै म बोलेँ भने दुईतिहाइको सरकारलाई गाह्रो पर्ला, त्यसैले मलाई बोल्न नलगाउनुस् । जब म बोल्ने समय आउँछ, त्यसपछि धेरैको बोली बन्द हुन्छ,’ उनले भने । 

तथापि राजावादीहरूको व्यवस्था विरोधी गतिविधिप्रति उनले कुनै जवाफ दिएनन् । रविले आफू आवेग र उत्तेजनामा नबोल्ने बताए । 

‘मुलुकमा गम्भीर अवस्थामा आएको छ । जिम्मेवार दलका हिसाबले, जनताले आशा र भरोसाले हेरेको दलको नेतृत्वकर्ताका हिसाबले म आवेग उत्तेजनामा अभिव्यक्ति दिने पक्षमा छैन,’ उनले भने, ‘मलाई तपाईंहरूको प्रश्नको आशय थाहा छ । यसले कुन अर्थ लाग्छ भन्नेमा जानकार छु । यो देशको भविष्य तपाईं हाम्रो पुस्ताको हातमा आउँदैछ । एकदमै गम्भीर हुने समय हो ।’