काठमाडौं । नेपाल प्रहरीले लागुऔषध विरुद्धको महाअभियान सुरु गरेको छ। आज काठमाडौंमा आयोजित एक कार्यक्रममार्फत गृहमन्त्री रमेश लेखकले अभियानको शुभारम्भ गर्नुभएको हो। उक्त अभियानमा महत्वपूर्ण व्यक्ति, युवा तथा विद्यार्थी, चलचित्रकर्मी, कला र संगीत क्षेत्रका विशिष्ट व्यक्तित्वहरू समेतलाई सहभागी गराइएको छ ।

गृहमन्त्री लेखकले लागुऔषध समाजका लागि गम्भीर चुनौती बनेको उल्लेख गर्दै यसको दुव्र्यसनले व्यक्तिगत जीवन मात्र होइन, समग्र परिवार र समाजलाई समेत कमजोर बनाइरहेको बताए । साथै, आत्महत्या, साइबर अपराध, यौनजन्य हिंसा, घरेलु हिंसा, सवारी दुर्घटना जस्ता घटनामा लागुऔषध दुव्र्यसनले मुख्य भूमिका खेलेको हुँदा यसविरुद्ध सामूहिक रूपमा लड्न सबैको सहकार्य आवश्यक रहेकोमा जोड दिए ।

उनले सरकारले मात्र नभई समाजका विभिन्न व्यक्तित्वहरूको सक्रिय संलग्नता आवश्यक रहेको र महाअभियानका रूपमा लागुऔषध विरुद्धको लडाइँलाई अघि बढाउन जरुरी रहेको बताए ।

गृहसचिव गोकर्णमणि दुवाडीले पनि लागुऔषध समाजमा पेचिलो समस्याका रूपमा उभिएको उल्लेख गर्दै, यसको नियन्त्रणका लागि नेपाल सरकारका प्रयास मात्र पर्याप्त नहुने र समाज, नागरिक, तथा सरोकारवाला निकायहरूको साथ र सहयोग अपरिहार्य रहेको बताए ।

प्रहरी महानिरीक्षक बसन्तबहादुर कुँवरले धन्यवाद ज्ञापन गर्दै लागुऔषधको उत्पादन, ओसारपसार, बिक्री वितरण र सेवनको असर नेपालमा पनि बढ्दो रहेको बताए । उनका अनुसार राजनीतिक दल, युवा समूह, अभिभावक, शिक्षक, कलाकार र सञ्चारकर्मीहरू को सक्रिय भूमिका भएमा महाअभियान अझ प्रभावकारी, गुणस्तरीय र परिणाममुखी हुने अपेक्षा गरिएको छ ।