सिरहाको नवराजपुर गाउँपालिका–१ भगवतीपुरकी १७ वर्षीया किशोरी रिङ्कुकुमारी सदामाथि सामूहिक बलात्कारपछि मृत्यु भएको घटनामा दोषीमाथि कडा कारबाहीको माग गरिएको छ ।

राष्ट्रियसभाको आजको बैठकमा आकस्मिक समयमा बोल्दै सांसद राधेश्याम पासवानले घटनाको १५ दिनसम्म दोषी पक्राउ नपरेको भन्दै सरकारको ध्यानाकर्षण गराए । उनले पीडितको परिवारलाई न्याय दिलाउन ढिलाइ नगर्न चेतावनी दिँदै भने, “संसद्मा बारम्बार मुद्दा उठाउँदा पनि कार्यान्वयन नहुनु दुःखद छ, जनताले हामीलाई के जवाफ दिने?”

माघ २७ गते राति शौच गर्न घर बाहिर निस्केकी रिङ्कुकुमारीमाथि स्थानीय तीन युवाले सामूहिक बलात्कार गरेको आरोप छ । पीडित भोलिपल्ट बिहान घर फर्केकी थिइन् भने माघ ३० गते साँझ आफ्नै घरमा झुण्डिएको अवस्थामा मृत भेटिइन् । मृतकको परिवारले घटनालाई शंकास्पद बताउँदै न्यायको माग गरेका छन् ।

घटनापछि वडासदस्यसहित केही स्थानीयले गाउँमै मिलाउने प्रयास गरेका थिए । पीडित परिवारको दबाबपछि मात्र प्रहरीले घटनामा संलग्न आठ जनाविरुद्ध पूरक जाहेरी दर्ता गरेको छ ।

सांसद पासवानले घटनामा प्रहरी प्रशासनको लापरवाही रहेको भन्दै दोषीलाई जतिसक्दो चाँडो पक्राउ गरी कडा कारबाही गर्न सरकारसँग माग गरेका छन् । “बलात्कारजस्तो जघन्य अपराधलाई दबाउने प्रयास सह्य हुँदैन,” उनले भने ।

यस घटनाले सिरहा लगायत देशभरका नागरिकको ध्यान खिचेको छ भने पीडितलाई न्याय दिलाउन दबाब बढ्दो छ ।