ताप्लेजुङस्थित पाथिभारा क्षेत्रमा जनताको इच्छाविपरीत केबलकार निर्माण सुरु गरिएको भन्दै सांसदहरूले तत्काल निर्माण कार्य रोक्न सरकारलाई माग गरेका छन् ।

प्रतिनिधिसभाको आकस्मिक समयमा सांसदहरूले पाथिभारा धार्मिक स्थलको संरक्षणलाई ध्यानमा राख्दै बल प्रयोग नगरी वार्ताबाट समाधान खोज्नुपर्नेमा जोड दिए । सांसद राजेन्द्रप्रसाद लिङ्देनले व्यापारीको स्वार्थ पूर्ति गर्न सरकारले योजनाबद्ध रूपमा काम गरिरहेको आरोप लगाउँदै भने, “सरकारी पहलमै पाथिभारा क्षेत्र व्यापारीको हातमा सुम्पन खोजिएको छ ।” उनले जनताको चाहना बेवास्ता गर्दा झडपको अवस्था सिर्जना भएको बताए ।

सांसद योगेश भट्टराईले केबलकार विवादलाई वार्ता र संवादबाट टुंग्याउन आग्रह गरे । सांसद तोसिमा कार्कीले विवादरहित समाधान खोज्न सरोकारवालासँग छलफल आवश्यक रहेको उल्लेख गर्दै बल प्रयोग रोक्न सरकारलाई आग्रह गरिन् ।

यसैबीच, बैठकमा विभिन्न मुद्दामा सांसदहरूले ध्यानाकर्षण गराए। सांसद पदम गिरीले भारतको उडिसास्थित केआइआइटी विश्वविद्यालयमा नेपाली विद्यार्थी प्रकृति लम्सालको मृत्युप्रति दुःख व्यक्त गर्दै विद्यार्थीको सुरक्षामा सरकार गम्भीर हुनुपर्ने बताए । सांसद रघुजी पन्तले १५०० नेपाली विद्यार्थीमध्ये ५०० भन्दा बढी फर्किरहेको उल्लेख गर्दै विद्यार्थीको सुरक्षा सुनिश्चित गर्न माग गरे ।

सांसद महेश बस्नेतले मेची राजमार्गको सडक दुर्घटना न्यूनिकरणका लागि सडक विस्तार आवश्यक रहेको बताए । सांसद रामप्रकाश चौधरीले सर्लाहीमा जंगली हात्तीले मकै र केराखेती नष्ट गरेको भन्दै पीडितलाई क्षतिपूर्ति दिन माग गरे ।

सांसद माधव सापकोटाले सुशासन अभावले नेपाल ‘ग्रे लिस्ट’ मा परेको बताए भने सांसद ईश्वरीदेवी न्यौपानेले लोकतन्त्रमाथि प्रहार सैह्य नहुने बताए ।

सरकारले उठेका मागप्रति चाँडै निर्णय लिने बताएको छ ।