कैलालीको धनगढी उपमहानगरपालिकाले आइतबारदेखि नगर बस सेवा सञ्चालनमा ल्याएको छ। यस सेवा अन्तर्गत कैलारी गाउँपालिकाको हसुलियादेखि गोदावरी नगरपालिकाको अत्तरिया रुटमा बसहरू चल्नेछन्।

 आइतबार आयोजित एक कार्यक्रममा फूलबारी बसपार्कमा नगर बस सेवाको औपचारिक उद्घाटन गरिएको हो। यो सेवा सुरुवातमा ६ वटा बसमार्फत सञ्चालन हुनेछ।

धनगढी उपमहानगरपालिकाले के एण्ड के कन्स्ट्रक्सनलाई नगर बस सेवा चलाउने जिम्मा दिएको छ, जसले वार्षिक २८ लाख ८८ हजार ९१९ रुपैयाँमा ठेक्का पाएको छ। नगर बस सेवा बिहान ६ बजेदेखि साँझ ७ बजेसम्म सञ्चालन हुनेछ। असोज १ गतेदेखि सुरु हुने यो सेवामा २० रुपैयाँ तिरेर करिब ७ किलोमिटर यात्रा गर्न सकिनेछ। हरेक ३० मिनेटको अन्तरालमा बस छुट्ने व्यवस्था मिलाइएको छ।

विशेष व्यवस्था अन्तर्गत, विद्यालय खुलेका दिन धनगढीका बाल विकास शिक्षक-शिक्षिकाहरूले नगर बसमा निःशुल्क यात्रा गर्न पाउनेछन्। यात्रुहरूलाई तोकिएको बस स्टपमा मात्रै झार्ने र चढाउने नियम लागू गरिनेछ।