राष्ट्रपति रामचन्द्र पौडेलले जुनसुकै धर्म वा सम्प्रदाय भए पनि सबैको अन्तिम लक्ष्य मानव सेवा हुनु पर्ने बताएका छन् । धरानमा श्रीकृष्ण प्रणामी धर्मशालाको उद्घाटन समारोहलाई सम्बोधन गर्दै राष्ट्रपति पौडेलले मानव सेवाबाट नै सहिष्णुता र समाजमा सद्भाव बढ्ने विश्वास व्यक्त गरे ।
"जुनसुकै धर्म वा सम्प्रदाय भए पनि यसको सार मानव सेवा नै हो। यदि हरेक धर्म र सम्प्रदायलाई यही दृष्टिकोणले बुझ्न सके समाजमा सहिष्णुता र बन्धुत्वको भावना विकास हुन्छ," राष्ट्रपति पौडेलले भने ।
उहाँले धार्मिक ग्रन्थहरूले सेवा र परोपकारलाई विशेष महत्व दिएको उल्लेख गर्दै वेदव्यासले अठार पुराण लेखिसकेपछि "परोपकार पुण्याय, पापाय परपीडनम्" भन्ने निष्कर्ष निकालेको स्मरण गराए ।
राष्ट्रपति पौडेलका मुख्य भनाइहरू:
धर्म र सम्प्रदायको उद्देश्य मानव सेवा हुनु पर्छ ।
परोपकारले समाजमा शान्ति, सहिष्णुता र ऐक्यबद्धता ल्याउँछ ।
भौतिक विकाससँगै आध्यात्मिक चेतनाको आवश्यकता छ।
निजानन्द सम्प्रदायको अभियानले समाजमा प्रेम र सद्भाव फैलाउँछ ।
राष्ट्रपतिले नेपाल पूर्वीय ज्ञान र परम्पराको स्रोत रहेको उल्लेख गर्दै विविध संस्कृतिमा एकताको उदाहरण देखाउन सकिने बताए । "हाम्रो वैदिक सनातन हिन्दु धर्मको विराट स्वरूपकै कारण विभिन्न सम्प्रदायहरूको विकास हुनु स्वाभाविक हो," उनले भने ।
उक्त अवसरमा राष्ट्रपति पौडेलले राधाकृष्ण मन्दिरमा आरती गरेका थिए। कार्यक्रममा कोशी प्रदेशका मुख्यमन्त्री हिक्मत कार्की र जगद्गुरु श्रीकृष्णमणि महाराजलगायतले शुभकामना मन्तव्य राखेका थिए ।
राष्ट्रपतिले धर्मशालालाई मानवीय सेवा र भावनाले प्रेरित अर्को प्रकारको मन्दिरको स्वरूप भएको अनुभूति भएको बताए। "धर्मशालाले समाजमा सभ्य र सुसंस्कृत परिवेश निर्माणमा योगदान पुर्याउनेछ भन्ने विश्वास लिएको छु," उनले थपे ।
धेरै पढिएका
तपाईको प्रतिक्रिया दिनुहोस