ढाका – बङ्गलादेशमा बढ्दो हिंसात्मक अपराध नियन्त्रणका लागि सञ्चालन गरिएको सुरक्षाबलको कारबाहीमा बिहीबार दुई जना मारिएका छन् । सुरक्षाबलका प्रवक्ता सामी-उद-दौला चौधरीका अनुसार लुटपाटमा संलग्न रहेको आशंकामा पक्राउ गर्न खोज्दा प्रतिकार भएपछि गोली चलाइएको हो ।

"अपराधीहरूले एक तले भवनको छतबाट गोली चलाएपछि टोलीलाई प्रतिकार गर्न बाध्य पारियो," चौधरीले बताएका छन्। घटनास्थलबाट खुकुरी र पिस्तोलसहित दुई शव फेला परेको सुरक्षाबलले जनाएको छ । उक्त घटनामा पाँच जना पक्राउ परेका छन्। मारिएका व्यक्तिहरू २५ वर्षीय मिराज हुसेन र २६ वर्षीय मोहम्मद जुम्मोन रहेको पुष्टि गरिएको छ ।

यता मृतक मिराज हुसेनकी आमा सुरमा बेगमले सुरक्षाबलमाथि आक्रोश व्यक्त गर्दै भनिन्, "सेनाले उनलाई पक्राउ गर्न सक्थ्यो, मार्नै किनुपर्‍यो?" स्थानीय बासिन्दा रहिमा बेगमका अनुसार घटनास्थलमा दर्जनौँ सैनिक सवारीसाधन देखिएको थियो र बासिन्दालाई घरभित्रै बस्न निर्देशन दिइएको थियो ।

पूर्व प्रधानमन्त्री शेख हसिनालाई २०२४ अगस्टमा आमजन विद्रोहद्वारा सत्ताबाट हटाइएपछि बङ्गलादेशमा अपराध नियन्त्रण चुनौतीपूर्ण बनेको छ । ढाका प्रहरीले गत वर्षको जनवरीदेखि लुटपाटको सङ्ख्या दोब्बर भएको जनाएको छ । हसिनाको शासनकालमा अर्धसैनिक र‍्यापिड एक्सन बटालियन (आरएबी) ले दर्जनौँ अतिरिक्त-न्यायिक हत्या गरेको आरोप लागेपछि सन् २०२१ मा अमेरिकी प्रतिबन्ध लगाइएको थियो। त्यसपछि यस्ता घटनामा कमी आए पनि पछिल्लो गोलीकाण्डले पुनः विवाद उत्पन्न गराएको छ ।

मानव अधिकार संगठन ऐन ओ सालिस केन्द्र (एएसके) ले अत्यधिक बल प्रयोगविरुद्ध चेतावनी जारी गरेको छ । एएसकेका अबु अहमद फैजुल कबीरले भने, "हामीले पछिल्लो दुई दशकमा हजारौँ अतिरिक्त-न्यायिक हत्याहरू देखेका छौँ, जसको कानून र व्यवस्था स्थितिमा शून्य प्रभाव परेको छ । अत्यधिक बल प्रयोगले केही हासिल हुँदैन।" उनले सुरक्षाबललाई ज्यान गुम्न नदिने गरी सावधानीका साथ कारबाही गर्न आग्रह गरेका छन् ।

सुरक्षाबलले लुटपाट नियन्त्रणका लागि अभियान जारी राख्ने जनाए पनि मानव अधिकार समूहले कानूनी प्रक्रियालाई प्राथमिकता दिन आग्रह गरेका छन् ।