धनगढी : सुदूरपश्चिम प्रदेशमा प्रादेशिक ललितकला प्रदर्शनी बिहीबारदेखि औपचारिक रूपमा सुरु भएको छ । सुदूरपश्चिम प्रदेश सभामुख भीमबहादुर भण्डारीले धनगढीमा आयोजित उद्घाटन समारोहमा प्रदर्शनीको उद्घाटन गर्नुभयो ।

नेपाल ललितकला प्रज्ञा–प्रतिष्ठान र सुदूरपश्चिम प्रज्ञा प्रतिष्ठानको संयुक्त आयोजनामा भएको प्रदर्शनी फागुन १२ गतेसम्म सञ्चालन हुनेछ । उद्घाटन कार्यक्रममा सभामुख भण्डारीले कला र संस्कृतिको संरक्षण तथा प्रवर्द्धनमा यस्ता कार्यक्रमले महत्वपूर्ण भूमिका खेल्ने बताए ।

प्रदर्शनीमा सुदूरपश्चिम प्रदेशका विभिन्न कलाकारहरूले सिर्जना गरेका चित्रकला, मूर्तिकला र हस्तकलाका विविध कृति प्रदर्शन गरिएको छ । आयोजक संस्थाका अनुसार प्रदर्शनीले स्थानीय कलाकारको प्रतिभा उजागर गर्ने र कला पारखीलाई विविध कला कृतिहरूको अवलोकन गर्ने अवसर प्रदान गर्ने लक्ष्य राखेको छ ।

प्रदर्शनीमा विद्यार्थी, कलाकार, स्थानीयबासी र पर्यटकहरूको उल्लेखनीय सहभागिता देखिएको छ। आयोजकले कार्यक्रमलाई कला, संस्कृति र पर्यटन प्रवर्द्धनको साझा प्लेटफर्मका रूपमा लिएको बताएका छन् ।