ओडिशाको कलिंगा इन्स्टिच्युट अफ इन्डस्ट्रियल टेक्नोलोजी (केआइआइटी) विश्वविद्यालयमा आइतबार नेपाली छात्रा प्रकृति लम्सालको शंकास्पद मृत्युपछि पक्राउ परेका तीन निर्देशक र दुई सुरक्षाकर्मीलाई अदालतले मंगलबार धरौटीमा रिहा गरेको छ ।

भुवनेश्वरस्थित न्यायिक मजिस्ट्रेट प्रथम श्रेणी-२ (जेएमएफसी-२) अदालतले उनीहरूलाई जनही २० हजार भारतीय रुपैयाँ धरौटीमा रिहा गर्ने आदेश दिएको हो । पक्राउ परेका व्यक्तिहरूमा केआइआइटीका मानव संसाधन महानिर्देशक शिवानन्द मिश्रा (५९), प्रशासन निर्देशक प्रताप कुमार चम्पती (५१), छात्रावास निर्देशक सुधीर कुमार रथ (५९), सुरक्षागार्ड रमाकान्त नायक (४५) र जोगेन्द्र बेहरा (२५) रहेका छन् ।

घटनापछि विश्वविद्यालयमा विद्यार्थीहरूको आक्रोश चुलिएको छ । विद्यार्थीहरूले मौन प्रदर्शन गर्दै नेपाली छात्राहरूलाई कुटपिट गरिएको र जबरजस्ती छात्रावासबाट निकालिएको आरोप लगाएका छन् । स्रोतका अनुसार, विश्वविद्यालयका कर्मचारी र सुरक्षाकर्मीले आक्रमणमा संलग्न रहेको उल्लेख गरिएको छ ।

यसैबीच, प्रकृतिको मृत्यु प्रकरणमा उनका साथी अड्विक श्रीवास्तवलाई प्रहरीले न्यायिक हिरासतमा राखी अनुसन्धान गरिरहेको छ ।

घटनाको गम्भीरता बुझ्दै ओडिशा सरकारले मंगलबार उच्चस्तरीय छानबिन समिति गठन गरेको छ । गृह विभागका अतिरिक्त मुख्य सचिवको नेतृत्वमा बनेको उक्त समितिमा महिला तथा बाल विकास र उच्च शिक्षा विभागका अधिकारीहरू सदस्य छन् । समितिले घटनाका सबै पक्षबारे छानबिन गरिरहेको बताइएको छ ।

सरकारले संलग्न सुरक्षाकर्मीहरूलाई तत्काल गिरफ्तार गरेको छ भने घटनामा संलग्न रहेका अधिकारीहरूलाई निलम्बन गरिएको ओडिशा सरकारले जनाएको छ ।