कोशी प्रदेशमा राष्ट्रिय प्रजातन्त्र दिवस २०८१ तीन दिनसम्म विविध कार्यक्रमसहित भव्य रूपमा मनाइने भएको छ । यसका लागि मुख्यमन्त्री हिक्मत कुमार कार्कीको अध्यक्षतामा मूल समारोह समिति गठन गरिएको छ ।

मुख्यमन्त्री तथा मन्त्रिपरिषद्को कार्यालयमा सम्पन्न बैठकले मुख्यमन्त्री कार्कीलाई मूल समारोह समितिको अध्यक्ष तोकेको छ । समितिमा प्रदेशसभाका सभामुख, उच्च अदालत विराटनगरका प्रमुख न्यायाधीश, प्रदेश सरकारका मन्त्रीहरू, उपसभामुख, प्रमुख प्रतिपक्षी दलका नेता, पूर्वमुख्यमन्त्रीहरू, राज्यमन्त्री, विराटनगर महानगरपालिकाका प्रमुख, मोरङका नगरपालिकाका प्रमुख, सुरक्षा निकायका प्रमुख गरी ६५ सदस्यीय समिति गठन गरिएको छ । मूल समारोह समितिको सचिवमा आन्तरिक मामिला तथा कानुन मन्त्रालयका निमित्त सचिव तोकिएका छन् ।

तीन दिनसम्म विविध कार्यक्रम

बैठकले फागुन ६, ७ र ८ गते विभिन्न कार्यक्रम आयोजना गरी प्रजातन्त्र दिवस मनाउने निर्णय गरेको छ ।

 फागुन ६ गते – कार्यालय, घर आँगन र सार्वजनिक स्थलमा सरसफाइ, रक्तदान कार्यक्रम, साँझ दीपावली ।
 फागुन ७ गते – बिहान ७ बजे मुख्यमन्त्री तथा मन्त्रिपरिषद्को कार्यालयबाट प्रभातफेरी, रोडशेष चोक, भूमि प्रशासन चोक, ट्राफिक चोक हुँदै मूल समारोहमा सहभागिता, साँझ दीपावली ।
 फागुन ८ गते – अस्पतालमा जेष्ठ नागरिक तथा वृद्धाश्रमका आश्रितलाई फलफूल वितरण, साँझ दीपावली ।

मुख्यमन्त्री कार्कीले प्रजातन्त्र दिवस ऐतिहासिक महत्त्वको दिन भएको भन्दै नागरिक सहभागितासहित भव्य रूपमा मनाउनुपर्ने बताए। उनले प्रजातन्त्र, लोकतन्त्र तथा संविधान दिवसजस्ता विशेष दिनमा योगदान दिने नागरिकलाई सम्मान गर्नुपर्नेमा जोड दिए ।

"यस्ता दिवसलाई प्रभावकारी बनाउन प्रदेश सरकारले आगामी दिनमा नीति तथा कार्यक्रममा बजेट व्यवस्था मिलाउने छ," उनले भने ।

आन्तरिक मामिला तथा कानुन मन्त्रालयका निमित्त सचिव एवं मूल समारोह समितिका सचिव कमल थापाले आगामी फागुन ४ गते बस्ने बैठकले थप सुझाव संकलन गर्ने जानकारी दिए। बैठकमा प्रदेश सरकारका मन्त्री, सुरक्षा निकायका प्रमुख, प्रदेशका सचिव तथा कर्मचारीहरूको उपस्थिति रहेको थियो ।