नेपाल पत्रकार महासङ्घ बागलुङ शाखामा स्थापित ‘विकास पौडेल स्मृति पत्रकारिता पुरस्कार कोष’ बाट राष्ट्रिय समाचार समिति (रासस)का स्थानीय समाचारदाता डम्मर बुढामगर पुरस्कृत भएकी छन् ।     
   
आज लेखनवृद्धि कोष घोषणा समारोहमा गण्डकी प्रदेशका उपसभामुख बिनाकुमारी थापाले राससकर्मी बुढामगरलाई नगद रु पाँच हजार र सम्मानपत्रसहित पुरस्कृत गरेकी हुन् । विसं २०८० मा स्थापित उक्त पुरस्कार कोषबाट पहिलो पटक बुढामगर सम्मानित हुनुभएको छ ।     
   
पत्रकार महासङ्घ बागलुङका साधारण सदस्य रहेकी विकास पौडेलको कोरोना सङ्क्रमणका कारण मृत्युभएपछि उनको परिवारले महासङ्घमा पत्रकारिता पुरस्कार कोष स्थापना गरेको थियो ।

एक दशकदेखि बागलुङको पत्रकारितामा सक्रिय बुढामगर विसं २०७९ देखि राससमा ढोरपाटनबाट स्थानीय समाचारदाताका रूपमा कार्यरत छिन् । बुढामगर पत्रकार महासङ्घ बागलुङका सह–सचिव समेत रहेकी छन् ।

त्यस्तै पत्रकार मित्रलाल खरेल र सिता खरेलद्वारा स्थापित ‘टिका धन खोज पत्रकारिता पुरस्कार–२०८१’बाट गोरखापत्रकर्मी पत्रकार रामकृष्ण बोहोरा पुरस्कृत भएकी छन् ।

विसं २०७७ मा पत्रकार मित्र खरेलका आमा धनकलि खरेल र बुबा टिकाराम खरेलको नाममा स्थापित सो पुरस्कार दोस्रो पटक बोहोरालाई प्रदान गरिएको हो । बोहोरा २२ वर्षदेखि पत्रकारिता पेसामा सक्रिय छन् ।