इजरायलको शिक्षा मन्त्रालयले सोमबार शिक्षा प्रणालीमा कृत्रिम बुद्धिमत्ता (एआई) प्रविधि एकीकृत गर्ने राष्ट्रिय पहल गर्ने नीति सार्वजनिक गरेको छ। यस योजना अन्तर्गत शिक्षक र विद्यार्थीलाई अत्याधुनिक एआई उपकरण तथा प्रशिक्षण कार्यक्रममार्फत शिक्षण र सिकाइमा सुधार गर्ने लक्ष्य राखिएको छ।

शिक्षामन्त्री योभ किशले भने, "हामीले शिक्षा प्रणालीलाई विश्वका प्रमुख हाई–टेक कम्पनीहरूसँग जोड्दै इजरायली बालबालिका र शिक्षकलाई एआई तालिम दिन अभूतपूर्व कदम चालेका छौं।" उनले इजरायललाई कृत्रिम बुद्धिमत्ताको युगमा शिक्षामा विश्वव्यापी मान्यता दिलाउने योजनामा सरकार प्रतिबद्ध रहेको बताएका छन् ।

उक्त पहलमा कक्षा ४ देखि १२ सम्मका विद्यार्थीहरूका लागि संरचित एआई पाठ्यक्रम समावेश गरिएको छ, जसले एआई अवधारणा र यसको अनुप्रयोगमा विद्यार्थीलाई व्यापक ज्ञान दिनेछ ।

गुगल, माइक्रोसफ्ट, एप्पल, र एनभिडिया लगायत ४०० भन्दा बढी हाई–टेक कम्पनीहरूबाट तीन हजार सल्लाहकारको तैनाती गरिनेछ। यी विशेषज्ञहरूले विद्यालयलाई एआई प्रविधिको प्रभावकारी कार्यान्वयनमा सहयोग गर्नेछन् ।

शिक्षकहरूको दक्षता अभिवृद्धि गर्न करिब ७० हजार शिक्षकलक्षित बृहत् तालिम कार्यक्रम सञ्चालन गरिने योजना छ।

शिक्षा मन्त्रालयका महानिर्देशक मीर शिमोनीले भने, "हाम्रो मुख्य चुनौती भनेको शिक्षामा मानवीय मूल्यहरूको संरक्षण गर्दै एआईको शक्तिलाई उपयोग गर्नु हो।"

पाँच नयाँ एआई उपकरणहरूको पर्यवेक्षित कार्यान्वयनलाई यस पहलको मुख्य चरणका रूपमा प्रस्तुत गरिएको छ।

इजरायलको यो कदमले शिक्षा क्षेत्रमा प्राविधिक रूपान्तरण ल्याउने विश्वास गरिएको छ।