काठमाडौं । मलेसियामा जारी यू-१९ महिला विश्वकपमा नेपालकी कप्तान पूजा महतो हालसम्म सर्वाधिक विकेट लिने बलर बनेकी छन् ।
आज आयोजक मलेसियासँगको खेलमा उनले आफ्नो खातामा चार विकेट थपिन् ।
प्रतियोगितामा पूजाले अहिलेसम्म ९ विकेट लिएकी छन् । आजको खेलअघि पूजा ५ विकेट लिएर सर्वाधिक विकेट लिनेको सूचीमा १६ औं स्थानमा थिइन् । आज चार विकेट थपेसँगै उनले छलाङ मारेर पहिलो स्थानमा उक्लिएकी हुन् । पूजाले बंगलादेश र स्कटल्यान्डविरुद्ध १–१ विकेट र अस्ट्रेलियाविरुद्ध ३ विकेट लिएकी थिइन् ।
यसअघि पहिलो स्थानमा श्रीलंकाकी चामुदी प्रबोदा थिइन् । उनले ३ खेलमा सात विकेट लिएकी छन् ।
यस्तै स्कटल्यान्डकी मैसी मसेरियाले पनि समान सात विकेट लिँदै दोस्रो स्थानमा छिन् । प्रतियोगितामा ६ जना बलरले समान ६ विकेट लिएका छन् ।
नेपाल प्रतियोगिताबाट बाहिरिइसकेको छ । त्यसैले पूजाको खातामा अरु विकेट थपिने छैन । उनलाई अन्य बलरहरुले उछिन्न सक्छन् ।
तपाईको प्रतिक्रिया दिनुहोस