काठमाडौं । विभिन्न सार्वजनिक कार्यक्रम एवं उद्घाटन समारोहमा सहभागी हुन दलका शीर्ष नेताहरू काठमाडौं उपत्यका बाहिर पुगेका छन् । उनीहरूमध्ये केही नेताहरू काठमाडौं उपत्यका बाहिर पुगेका छन् भने केही शुक्रबार जाँदैछन् । 

प्रधानमन्त्रीसमेत रहेका नेकपा (एमाले) अध्यक्ष केपी शर्मा ओली काठमाडौं उपत्यका बाहिरका विभिन्न सार्वजनिक कार्यक्रम एवं विकास निर्माणका कार्यहरूको उद्घाटन समारोहमा सहभागी हुन जाँदैछन् । 

प्रधानमन्त्री शुक्रबार पाल्पाको बगनासकाली गाउँपालिकाको भवन उद्घाटनका गर्न त्यसतर्फ जाँदैछन् । उनले तिनाउ दोभानमा निर्मित प्रशासकीय भवन उद्घाटन गर्नेछन् । 

त्यसपछि सिद्धबाबा सुरुङ मार्गको ब्रेकथ्रु, बुटवल गोरुसिंगे सडक शिलान्यास गर्ने कार्यक्रम छ । त्यस्तै उनी बुटवल उपमहानगरपालिका–१३ जितगढीमा आयोजित सडक स्तरोन्नति शिलान्यास कार्यक्रममा सहभागी हुने प्रधानमन्त्रीको सचिवालयले जनाएको छ । 

त्यसैगरी शुक्रबार दिनभरजसो पाल्पा र रूपन्देहीका विभिन्न कार्यक्रममा व्यस्त हुनेछन् ।

प्रमुख प्रतिपक्षी नेकपा (माओवादी केन्द्र) अध्यक्ष पुष्पकमल दाहाल ‘प्रचण्ड’ दाङमा हुनेछन् । प्रचण्ड शुक्रबार लुम्बिनीका विभिन्न जिल्लाका कार्यक्रममा सहभागी हुनेछन् । बिहीबार बाँकेका विभिन्न कार्यक्रममा सहभागी भएका प्रचण्ड शुक्रवार दाङ जिल्लामा पुगेका छन् । 

प्रचण्डले तुलसीपुरको अरणिको मैदानमा हुने पार्टीको नगर अधिवेशन उद्घाटन तथा खबरदारी सभालाई सम्बोधन गर्ने कार्यक्रम रहेको छ ।