काठमाडौं । आईसीसी महिला यू-१९ विश्वकप क्रिकेट प्रतियोगिताबाट नेपाल बाहिरिएको छ । बुधबार भएको समूहचरणको अन्तिम खेलमा उपाधि दाबेदार अष्ट्रेलियासँग ८३ रनको फराकिलो हार व्यहोर्दै नेपालले विश्वकप यात्रा टुंग्याएको हो । समूह चरणमा नेपालले एउटा खेल पनि जित्न सकेन ।

मलेसियाको बाङ्गीस्थित यूकेएल क्रिकेट ओभलमा बुधबार भएको खेलमा नेपालले अष्ट्रेलियालाई बलियो चुनौति दिन सकेन । अष्ट्रेलियाले दिएको १४० रनको लक्ष्य पछ्याउने छनक नेपालले कहिले पनि देखाएन । ब्याटरहरुले जित्ने भन्दा पनि २० ओभर टिक्ने रणनीति बनाएका थिए ।

नेपालले पूरै ओभर खेले पनि ८ विकेटको क्षतिमा ५६ रन मात्र बनाउन सक्यो । नेपालका लागि कप्तान पूजा महतोले फेरि एकपटक सर्वाधिक १८ रन बनाइन् । तर, उनको ब्याटिङ शैली भने प्रश्नयोग्य थियो । टेस्ट जसरी खेलेकी पूजाले ४२ बलको सामना गर्दा एउटा पनि बाउन्ड्री निकाल्न सकिनन् । उनी लुज सट खेलेर आउट भइन् । अन्य खेलाडीले दोहोरो अङ्कको रन बनाउन सकेनन् ।

अष्ट्रेलियाका लागि हसरत गिल र जुलियट मोर्टनले २-२ विकेट लिए । यसअघि अष्ट्रेलियाले पूरै २० ओभर खेलेर ६ विकेटको क्षतिमा १३९ रन बनाएको थियो । अष्ट्रेलियाका लागि काइमोही ब्रेले ४५ रन बनाइन् । एलेनोर लारोसाले ३० रन बनाइन् ।

खेलको सुरुवाती ओभरमा नेपालकी कप्तान महतोले ३ विकेट लिएर अष्ट्रेलियालाई दबाबमा ल्याएपनि काइमोही र एलेनोरको ब्याटिङ नेपाललाई महँगो साबित भयो । नेपालका लागि पूजाले ३ विकेट लिइन् । पूजाले ४ ओभरमा रन खर्चेर ३ विकेट लिएकी हुन् । सीमाना केसीले लगातार २ विकेट लिइन् । उनले १७.१ र १७.२ ओभरमा विकेट लिइन् । रिया शर्माले १ विकेट लिइन् ।