अमेरिकाको ४७औँ राष्ट्रपतिको रूपमा डोनाल्ड ट्रम्पले आज शपथ ग्रहण गर्दैछन् । सञ्चार माध्यमको धेरैजसो सर्वेक्षणलाई असत्य साबित गर्दै, ट्रम्पले सन् २०२४ को नोभेम्बरमा भएको चुनावमा जित हात पारेका थिए । शपथ ग्रहण समारोह नेपाली समयअनुसार मध्यरातमा (जीएमटी साँझ ५ बजे) हुनेछ । 

प्रधानन्यायाधीश जोन रोबर्ट्सले उनलाई शपथ गराउने कार्यक्रम छ । यस पटकको शपथ ग्रहण कार्यक्रम हलभित्र गरिने बताइएको छ, जसको मुख्य कारण अमेरिकामा यस समयको चिसो मौसम हो ।

ऐतिहासिक शपथ ग्रहण कार्यक्रम
शपथ ग्रहण समारोहमा वर्तमान राष्ट्रपति जो बाइडेन उपस्थित भएर शान्तिपूर्ण सत्ता हस्तान्तरणमा सहभागी हुनेछन् । त्यस्तै, विश्वभरका नेताहरूले पनि कार्यक्रममा उपस्थिति जनाउनेछन् । ट्रम्पका निकट मित्र अर्जेन्टिनाका राष्ट्रपति जेभियर मिलाई र हंगेरीका प्रधानमन्त्री भिक्टर उर्बान विशेष अतिथिका रूपमा सहभागी हुनेछन् । साथै, प्रविधि क्षेत्रका अगुवा एलन मस्क, जेफ बेजोस र मार्क जुकरबर्गले पनि आफ्नो उपस्थिति जनाउने तयारी गरेका बताइएको छ ।

‘मेक अमेरिका ग्रेट अगेन’ अभियानलाई उत्साहजनक बनाउँदै ट्रम्पको शपथ ग्रहण समितिले १७० मिलियन अमेरिकी डलर चन्दा संकलन गरेको छ । यो रकम भव्य समारोह आयोजना गर्नका लागि खर्च गरिनेछ ।

डोनाल्ड ट्रम्पले पहिलो कार्यकालमा जस्तै, यसपटक पनि आप्रवासन नीति, सीमा सुरक्षा, जलवायु परिवर्तन, ऊर्जा स्रोत, र क्रिप्टो करेन्सी जस्ता विषयहरूलाई प्राथमिकता दिने संकेत गरेका छन् । पहिलो दिनमै उनले केही विवादास्पद कार्यकारी आदेशमा हस्ताक्षर गर्ने सम्भावना छ, जसमा आप्रवासी समस्याका लागि समाधान खोज्ने र अमेरिकी अर्थतन्त्रलाई उचाइमा पुर्‍याउने योजनाहरू समेटिनेछन् ।

आप्रवासी नीतिमा कठोर
सन् २०२३ सम्ममा अमेरिकामा झन्डै एक करोड १७ लाख कागजातविहीन आप्रवासी रहेको अनुमान छ । ट्रम्पले एक करोडभन्दा बढी अवैध आप्रवासीलाई देशबाट फिर्ता पठाउने घोषणा गरिसकेका छन् । यो निर्णयले आप्रवासी समुदायमा त्रास फैलाएको छ भने आप्रवासी अधिकारका क्षेत्रमा कार्यरत संस्थाहरूलाई कामको चाप बढाएको छ ।

सन् २०२३ को अन्त्यतिर जो बाइडेन प्रशासनले सीमा सुरक्षा कडा गरेपछि, दक्षिण अमेरिकी मुलुकहरूबाट आउने आप्रवासीहरूको संख्या घटेको थियो । ट्रम्प प्रशासनले यस क्षेत्रलाई अझ कडा बनाउने र अवैध आप्रवासनलाई रोक्न थप नीतिहरू ल्याउने तयारी गरेको छ ।

ह्वाइट हाउस प्रवेश गरेपछि ट्रम्पले पेन्सिल्भेनिया एभेन्युमा आयोजना हुने सैनिक कवाज र परेडमा सहभागी हुनेछन् । शपथ ग्रहणकै दिन उनी सयभन्दा बढी कार्यकारी आदेशमा हस्ताक्षर गर्ने योजना बनाइरहेका छन् ।

कार्यक्रमलाई ऐतिहासिक बनाउने उद्देश्यले विजय जुलुस, कन्सर्ट, आतसबाजी, र राष्ट्रिय भोजको आयोजना गरिएको छ । विशेष चन्दा दिने व्यक्तिहरूलाई ट्रम्प र उनको मन्त्रिपरिषद्का सदस्यहरूसँग प्रत्यक्ष भेटघाटको अवसर प्रदान गरिनेछ ।

ट्रम्पको पुनरागमनसँगै अमेरिकाको नीतिमा व्यापक परिवर्तनको संकेत देखिएको छ । व्यापार नीति, अन्तर्राष्ट्रिय सम्बन्ध, र जलवायु परिवर्तनसम्बन्धी सम्झौतामा ट्रम्पको अडानले संसारभर प्रभाव पार्ने अपेक्षा गरिएको छ ।