झापा माईखोलामा पौडी खेल्दा एक जनाको मृत्यु, एक बेपत्ता
शिवसताक्षी नगरपालिका–१० झापा स्थित माईखोलामा पौडी खेल्ने क्रममा आज एक जनाको मृत्यु भएको छ भने एक जना बेपत्ता भएका छन्। भद्रपुर नगरपालिका–५ का १७ वर्षीय फिरोज खानको डुबेर मृत्यु भएको जिल्ला प्रहरी कार्यालयका प्रवक्ता प्रहरी नायब उपरीक्षक कृष्णकुमार चन्दले जानकारी दिएका छन् ।
बेपत्ता भएका व्यक्ति बिर्तामोड नगरपालिका–२ का १८ वर्षीय उज्ज्वल राई हुन्। फिरोज खान र उज्ज्वल राईसहित चार जना दोमुखा घुम्न आएका थिए र माईखोलामा नुहाउन पसेका थिए। नुहाउने क्रममा खान र राई खोलामा डुबेर बेपत्ता भएका थिए।
प्रहरी टोलीले घटनाको जानकारी पाउने बित्तिकै खोजी कार्य सुरु गरेको थियो। फिरोज खानको शव घटनास्थलबाट करिब एक सय मिटर तल ढुङ्गामा अड्किएको अवस्थामा फेला परेको थियो। उज्ज्वल राईको खोजी कार्य हाल पनि जारी रहेको छ, जसमा कोशी प्रदेश प्रहरी विपद् व्यवस्थापन गुल्म चन्द्रगढी र सशस्त्र प्रहरी बल नेपाल सुरक्षा बेस क्याम्प शनिश्चरको टोली खटिएका छन्।
मृतक फिरोज खानको शव परीक्षणका लागि प्रादेशिक अस्पताल भद्रपुर पठाइएको प्रहरीले जनाएको छ।
तपाईको प्रतिक्रिया दिनुहोस