आइतबार र सोमबार विभिन्न स्थानमा भएका छुट्टाछुट्टै सवारी दुर्घटनामा पाँच जनाको ज्यान गएको छ ।

मकवानपुरको मनहरी गाउँपालिका-६ नयाँबस्तीमा विद्यालय बसको ठक्करबाट २ वर्षीया पूजा थिङको मृत्यु भएको छ । गम्भीर घाइते उनको हेटौंडा अस्पतालमा उपचारका क्रममा ज्यान गएको हो ।

बाँकेको जानकी गाउँपालिका-३ मा ट्याक्टर दुर्घटनामा सहचालक २८ वर्षीय रफिक जोलाहको घटनास्थलमै मृत्यु भएको छ। फरार चालकको खोजी भइरहेको छ ।

धनुषाको सबैला नगरपालिका-१० मा कार र मोटरसाइकल ठोक्किँदा २१ वर्षीय अमन कुमार साहको ज्यान गयो। गम्भीर घाइते अर्का व्यक्तिलाई उपचारका लागि जनकपुर पठाइएको छ ।

रूपन्देहीको रोहिणी गाउँपालिकामा मोटरसाइकल दुर्घटनामा २६ वर्षीय राजेन्द्र चौधरीको मृत्यु भएको छ भने चालकको उपचार भइरहेको छ ।

कपिलवस्तुको बुद्धभुमि नगरपालिका-२ मा ट्रकले मोटरसाइकललाई ठक्कर दिँदा २० वर्षीय अर्जुन थारूको मृत्यु भएको छ ।