थाइल्याण्डको मन्त्रिपरिषद्ले पर्यटन प्रवद्र्धन र रोजगारी सिर्जनाका लागि तोकिएका ‘मनोरञ्जन कम्प्लेक्स’मा जुवालाई वैधानिकता दिने विवादास्पद विधेयकलाई सोमबार अनुमोदन गरेको छ ।

प्रस्तावित कानूनले पर्यटन परिसरभित्र क्यासिनो स्थापना गर्न अनुमति दिनेछ जसमा थीम पार्क, वाटर पार्क, होटल र सपिङ मलहरू पनि समावेश हुनेछन् । 

छिमेकी कम्बोडिया, लाओस र म्यान्मारमा छायादार क्यासिनो कम्प्लेक्सहरू खुलेपनि बौद्ध बहुल थाइल्याण्डमा कन्जरभेटिभ शक्तिहरूले जुवालाई वैधता दिने कदमको लामो समयदेखि विरोध गर्दै आएका छन् । 

लागूऔषध तथा अपराधसम्बन्धी संयुक्त राष्ट्रसंघीय कार्यालयले गत वर्ष सार्वजनिक गरेको एक प्रतिवेदनमा दक्षिणपूर्वी एसियाका क्यासिनोहरू ‘संगठित अपराधले प्रयोग गर्ने बैंकिङ संरचनाका आधारभूत टुक्राहरू’ भएको चेतावनी दिएको थियो।

हाल, थाइल्याण्डमा जुवा केही राज्यद्वारा संचालित घोडा दौड र आधिकारिक चिट्ठामा मात्र कानुनी मानिन्छ, तर अवैध सट्टेबाजी व्यापक छ ।

प्रधानमन्त्री पेटोङ्टार्न सिनावात्राले पत्रकारहरूसँग विधेयकबारे भने, ‘यसको उद्देश्य राजस्व बढाउनु, थाइल्याण्डमा लगानीलाई समर्थन गर्नु र अवैध जुवाको समाधान गर्नु हो ।’

संसदमा सांसदहरूले छलफल र मतदान गर्नुअघि यो विधेयक मस्यौदाका लागि राज्य परिषद्को कार्यालयमा जानेछ र यो प्रक्रियाका लागि महिनौँ लाग्नेछ ।

थाइल्याण्डको महत्वपूर्ण पर्यटन उद्योगलाई तहसनहस बनाएको कोभिड–१९ महामारीका अन्त्यसँगै थाइल्याण्डले चिनियाँ र भारतीय यात्रीहरूको लागि भिसा आवश्यकताहरू कटौती गर्नेजस्ता अधिक आगन्तुकहरूलाई आकर्षित गर्न धेरै रणनीतिहरू सुरू गरेको छ ।

उपअर्थमन्त्री जुलापुन अमोर्नभिभाटले मनोरञ्जन कम्प्लेक्सले अन्ततः पर्यटकको संख्यामा ५–१० प्रतिशतले वृद्धि गर्ने र एक लाख ५० सम्म नयाँ रोजगारीको अवसर सिर्जना गर्ने सरकारले विश्वास गरेको छ । 

प्रस्तावित कम्प्लेक्सहरूको लागि स्थान, र तिनीहरूको निर्माणको लागि समय तालिका, घोषणा गरिएको छैन ।