काठमाडौं । प्रधानमन्त्री केपी शर्मा ओली शीतल निवास पुगेका छन् । 

राष्ट्रपति रामचन्द्र पौडेललाई भेट्न प्रधानमन्त्री ओली शुक्रबार अपराह्न केहीबेर अघि शीतल निवास पुगेका हुन् । 

उनीहरूबीच समसामयिक राजनीतिक घटनाक्रमका विषयमा छलफल भएको राष्ट्रपति पौडेलको सचिवालयले जनाएको छ । 

कानुन मन्त्री अजयकुमार चौरसिया, मुख्यसचिव एकनारायण अर्याल र कानुन सचिव उदयराज सापकोटालाई लिएर प्रधानमन्त्री ओली राष्ट्रपति भेट्न शीतल निवास पुगेका हुन् । 

यसअघि प्रधानमन्त्री ओलीले तत्काल संविधान संशोधन हुन नसक्ने बताएका थिए । उनले २०८७ भन्दा अघि संशोधन हुन नसक्ने बताएका छन् । 

उक्त अभिव्यक्तिलाई लिएर कांग्रेस महामन्त्रीले ७ बुँदे सहमतिमाथि धोका हुने संकेत गरेका छन् ।