काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले प्रधानमन्त्री केपी शर्मा ओली र प्रमुख सत्तारूढ नेपाली कांग्रेस सभापति शेरबहादुर देउवासँग भेटवार्ता गरेका छन् । 

केही दिन पहिले लिङ्देनले निवासमा पुगेर देउवालाई भेटेका थिए । त्यस्तै उनले बिहीबार साँझ प्रधानमन्त्री निवास बालुवाटार पुगेरै ओलीसँग भेटवार्ता गरेका हुन् । 

भेटवार्ताको क्रममा विविध पक्षमा लामो कुराकानी भएको लिङ्देनको सचिवालयले जनाएको छ । राष्ट्रिय एकता दिवस तथा पृथ्वी जयन्तीका अवसरमा पौष २७ गते राप्रपाले भृकुटी मण्डपमा चियापान कार्यक्रमको आयोजना गरेको छ । 

चियापान कार्यक्रममा निमन्त्रणा दिनेक्रममा ओलीसँग समसामयिक राजनीतिक घटनाक्रमबारे उनीहरूबीच छलफल भएको बताइएको छ । 

लिङ्देनले प्रमुख प्रतिपक्षी नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’सँग पनि भेटवार्ता गर्ने बताइएको छ । 

राष्ट्रिय एकता दिवस तथा पृथ्वी जयन्तीका अवसरमा पौष २७ गते राप्रपाले भृकुटीमण्डपमा चियापान कार्यक्रमको आयोजना गरेको छ । उक्त कार्यक्रमको मञ्चमा सत्ता र प्रतिपक्षी दलका नेताहरूलाई लिङ्देनले उभ्याउने कोसिस गरेका छन् ।