नेपाल स्टक एक्सचेञ्ज (नेप्से) साताको अन्तिम कारोबार दिन ०.६८ प्रतिशतले घटेर २,६३५.०९ विन्दुमा सीमित भएको छ। बलिया कम्पनीहरूको मापक सेन्सेटिभ इन्डेक्स पनि ०.६५ प्रतिशतले घटेर ४४८.५४ विन्दुमा झरेको छ ।

आज नेप्सेमा सूचीकृत ३०८ स्क्रिप्टका १ करोड ५७ लाख २३ हजार ३७९ कित्ता सेयरको ७ अर्ब ३० करोड ५३ लाख रुपैयाँभन्दा बढीको कारोबार भएको छ। यो कारोबार मंसिर २३ पछिकै उच्च हो ।

पुस मसान्तको दबाबले बजार घटेको हुनसक्ने शेयर बजारका विज्ञहरुले बताएका छन् । यो महिना ब्याज तथा कर तिर्नुपर्ने भएकाले लगानीकर्ताले सेयर बिक्री गर्नुपरेको जनाए । उनले आगामी महिनाबाट ब्याजदर न्यून, तरलता प्रचुर र सेयर मूल्य सस्तो भएकाले बजारले सुधार गर्ने विश्वास व्यक्त गरेका छन् ।

समूहगत सूचक
नेप्सेमा सूचीकृत १३ समूहमध्ये होटल समूह मात्र ०.९९ प्रतिशतले बढ्यो। बाँकी समूहहरू सबै रातो देखिएका छन् ।

फाइनान्स समूह: २.९३% गिरावट।
विकास बैंक: २.०४% गिरावट।
लघुवित्त: १.२५% गिरावट।
जीवन बीमा: १.१४% गिरावट।
धेरै कारोबार गर्ने कम्पनीहरू
सुपर मादी हाईड्रोपावर: ४४ करोड ३६ लाख।
सिनर्जी पावर: २८ करोड १९ लाख।
सिन्धु विकास बैंक: २४ करोड ६ लाख।
धेरै कमाउने र गुमाउने कम्पनीहरू
बाराही हाईड्रो र हिमालयन पावर: १०% वृद्धि ।
सिनर्जी पावर: ५.६०% वृद्धि ।
सप्तकोशी डेभलपमेन्ट बैंक: ९.२३% गिरावट ।
माया खोला हाईड्रोपावर: ८.४६% गिरावट ।

लगातार ६ दिन बढेको बजारमा आज नाफा बुकिङ, ब्याज, र कर दबाबका कारण गिरावट देखिएको छ । तर, आगामी महिनादेखि बजारले गति लिने अपेक्षा गरिएको छ ।