बलिउडको चर्चित फिल्म ‘स्त्री २’ अब ठूलो पर्दाबाट घरको सानो पर्दामा सर्ने भएको छ। सन् २०१८ मा रिलिज भएको ‘स्त्री’ को सिक्वेलको रूपमा आएको यो फिल्मले बक्स अफिसमा तहल्का मच्चाएको थियो।

अमर कौशिक निर्देशित र दिनेश विजनद्वारा निर्मित यस फिल्ममा श्रद्धा कपूर र राजकुमार रावको अभिनयले दर्शकको मन जितेको थियो। रिलिज भएको केही महिनाभित्रै फिल्मले ५ सय करोडभन्दा बढीको व्यापार गरिसकेको छ।

पछिल्लो रिपोर्ट अनुसार, ‘स्त्री २’ अब सेप्टेम्बर २७ देखि ओटीटी प्लेटफर्म अमेजन प्राइम भिडियोमा स्ट्रिम हुने भएको छ। यद्यपि, निर्माताहरूले यसको औपचारिक पुष्टि भने गरेका छैनन्।

हालसम्म पनि फिल्म सिनेमा हलमा प्रदर्शन भइरहेको छ र राम्रो व्यापार गरिरहेको छ। तर, अब चाँडै नै दर्शकहरूले घरमै बसेर पनि यस फिल्मको मज्जा लिन पाउने भएका छन्।‘स्त्री २’ एक हास्य प्रधान डरलाग्दो फिल्म हो जसले दर्शकलाई रमाइलोसँगै डर पनि लगाउँछ। फिल्ममा श्रद्धा कपूर र राजकुमार रावसँगै पंकज त्रिपाठी, अभिषेक बनर्जी र अपारशक्ति खुरानाको मुख्य भूमिका रहेको छ।