काठमाडौं । प्रहरीको नक्कली इन्सपेक्टर बनेर ठगी गर्ने दुई जनालाई प्रहरीले पक्राउ गरेको छ । उनीहरूलाई गत आइतबार उपत्यका अपराध अनुसन्धान कार्यालय टेकुबाट खटिएको प्रहरीले पक्राउ गरेको हो ।

पक्राउ पर्नेहरूमा काठमाडौं कागेश्वरी मनोहरा नगरपालिका–७ थापाचोक बस्ने ३८ वर्षीय सुदीप थापा र सप्तरी कडक नगरपालिका–१० घर भई काठमाडौं महानगरपालिका–३२ कोटेश्वर बस्ने ४४ वर्षीय किशोर कुमार चौधरी रहेका छन् । 

प्रहरी निरीक्षकको पोशाक र विभिन्न कागजात दुरूपयोग गरी वैदेशिक रोजगारका लागि क्यानडा, अष्ट्रेलियालगायतका देशमा पठाईदिन्छु भन्दै ठगी गरेको आरोपमा उनीहरूलाई पक्राउ गरिएको प्रहरीले जनाएको छ । 

दुवैलाई ठगी तथा किर्तेसम्बन्धी कसूरमा आवश्यक अनुसन्धान तथा कारवाहीको लागि जिल्ला प्रहरी परिसर भद्रकाली पठाइएको छ ।