काठमाडौं । नेकपा (एमाले) र माओवादी केन्द्रको केन्द्रीय समिति बैठकमा भूतपूर्वको अभाव र विरोध भएको छ । हिजो (आइतबार) देखि जारी दुवै दलको बैठकमा उनीहरूको अभाव र विरोध भएको हो । 

आज (सोमबार) एमालेको केन्द्रीय समिति बैठकमा यसअघि माओवादी परित्याग गरि एमाले प्रवेश गरेका रामबहादुर थापा ‘बादल’, लेखराज भट्टलगायतका केही नेताको अभाव महसुस भएको थियो । 

एमाले केन्द्रीय सदस्यहरूले उनीहरूलाई उपेक्षा गरेको बताएका छन् । बैठकमा सहभागी अधिकांश नेताहरूले माओवादीबाट आएकाहरूलाई उपेक्षा गर्नुभन्दा जिम्मेवारी दिनुपर्ने माग राखेका हुन् । 

नक्कली भुटानी शरणार्थी प्रकरणमा हाल केन्द्रीय कारागारमा रहेका निलम्बित सचिव टोपबहादुर रायमाझीबारे प्रश्न उठेको थियो । उनीसँगै पूर्वमाओवादी पृष्ठभूमिका केही नेताले पार्टीमा उचित जिम्मेवारी नपाएको भन्दै असन्तुष्टि व्यक्त गरेका छन् । 

बैठकमा केन्द्रीय सदस्य परशुराम अधिकारीले पूर्वमाओवादी नेताहरूलाई उपेक्षा गरिएको बताए । उनले भने, ‘अध्यक्ष ओलीनिकट गुट छ, संस्थापनइतरमा पनि गुट छन् । माओवादी छाडेर एमालेमा आएकाहरूको कुनै गुटमा छैन । माओवादीबाट आएकाहरूले जिम्मेवारी पनि पाएनन् । त्यहीकारण कतिपय साथीहरू पूरानै घरतिर जान थाल्नु भएको छ ।’

त्यस्तै नेकपा (माओवादी केन्द्र)को केन्द्रीय समितिको बैठकमा पूर्वउपराष्ट्रपति नन्दबहादुर पुन ‘पासाङ’को विरोध भएको छ । उनी राजनीतिमा फर्कने निर्णयले विरोध भएको हो । 
बैठकको राजनीतिक प्रतिवेदनमाथिको छलफलमा आफ्नो धारणा राख्दै पूर्वमन्त्रीसमेत रहेका माओवादी नेता सुदन किरातीले पूर्वउपराष्ट्रपति पुन राजनीतिमा फर्कनुले राम्रो सन्देश नजाने बताए । 

‘उपराष्ट्रपति बनिसकेको व्यक्ति पुनः सक्रिय राजनीतिमा फर्कन लागेको खबरले राम्रो सन्देश गएको छैन,’ किरातीले बैठकमा भने, ‘१२ हातको सरस्वतीलाई तीन हातको मन्दिरमा नराखौँ ।’