बारा जिल्लाको सिम्रौनगढ नगरपालिका-७ खजानीबाट अवैध लागूऔषध गाँजा १ सय ४२ किलोग्राम बुधबार राति प्रहरीले बरामद गरेको छ। 

श्रीनगर बैरीया प्रहरी चौकीबाट खटिएको टोलीले कोतवाली नहरबाट खजानीतर्फ जाँदै गरेको बीआर २२ एक्यु २९७६ नम्बरको मोटरसाइकललाई जाँच गर्न खोज्दा चालक मोटरसाइकल छोडेर फरार भएका थिए। त्यसपछि मोटरसाइकलमा रहेका तीन बोरामा गाँजा फेला परेको हो।

त्यस्तै, मोरङ, सुनवर्षी नगरपालिका-६ झपडतलस्थित सडकमा वेवारिसे अवस्थामा रहेको झोलाबाट थप २५ किलोग्राम गाँजा फेला परेको छ। प्रहरी चौकी डाइनियाबाट खटिएको टोलीले सडक छेउमा रहेको प्लास्टिकको झोलाबाट उक्त गाँजा बरामद गरेको हो।