नेकपा एमालेको पोलिटब्युरो बैठक आज पनि जारी रहनेछ, जुन पार्टी केन्द्रीय कार्यालय च्यासलमा बिहान ११ बजे सुरु हुनेछ।

एमाले प्रचार विभाग प्रमुख राजेन्द्र गौतमले बैठकमा पोलिटब्युरो सदस्यहरूले आफ्ना विचार राख्ने जानकारी दिए। प्रत्येक सदस्यलाई धारणा राख्न तीन मिनेट समय दिइने छ।

पहिलो दिनको बैठकमा पार्टी अध्यक्ष तथा प्रधानमन्त्री केपी शर्मा ओलीले समग्र राजनीतिक परिस्थितिका बारेमा चर्चा गरेका थिए। उनले आगामी निर्वाचनमा गठबन्धन नगर्ने कांग्रेसको निर्णयलाई स्वागत गर्दै एमालेले पनि चुनावमा कुनै गठबन्धन नगर्ने निर्णय गरेको जानकारी दिए।

महासचिव शंकर पोखरेलले निर्णायक राष्ट्रिय शक्ति निर्माणका लागि वार्षिक कार्ययोजना प्रस्तुत गरेका थिए, जसमा सदस्यता विस्तारदेखि सङ्गठनको विकासको खाका राखिएको छ।

एमालेले १० लाख सदस्यहरूको लक्ष्य राखेको छ। कार्ययोजनामा वडामा कुल मतदाताको तीन प्रतिशत र पालिका र जिल्लामा १० प्रतिशत सङ्गठित सदस्य बनाउने लक्ष्य राखिएको छ।