बारागढी गाउँपालिका-२ दौर्वा चोकमा पिकअप गाडीको ठक्करबाट एक ७२ वर्षीया पैदलयात्रीको मृत्यु भएको छ।

दौर्वाबाट मलाहीतर्फ जाँदै गरेको प्रदेश २-०३-००१ च २८१० नम्बरको पिकअपले ठक्कर दिँदा स्थानीय निवासी कबित्री देबी महरा गम्भीर घाइते भएकी थिइन्। घाइते अवस्थामा उपचारका लागि प्रादेशिक अस्पताल, कलैया लगिए पनि उपचारकै क्रममा गए राति उनको मृत्यु भएको हो।

घटनापछि प्रहरीले पिकअप चालकलाई नियन्त्रणमा लिई दुर्घटनाको अनुसन्धान सुरु गरेको छ। ठक्करका कारण र चालकको लापरबाहीबारे थप अनुसन्धान भइरहेको प्रहरीको भनाइ छ।

सडक दुर्घटनाको क्रम बढ्दै गइरहेको बारा जिल्लामा ट्राफिक नियम पालनामा कडाइ गर्नुपर्ने आवश्यकता देखिएको छ। स्थानीयहरूले दुर्घटनामा कमी ल्याउन प्रभावकारी कदम चाल्न माग गरेका छन्।