देशका विभिन्न स्थानमा शनिबार राति र आइतबार बिहान भएका आगलागीका घटनामा करोडौँ रूपैयाँ बराबरको धनमाल नष्ट भएको छ।
काठमाडौं महानगरपालिका-३१ बानेश्वरस्थित विक्की नेपालको फेन्सी पसलमा करेन्ट सर्ट हुँदा सुरु भएको आगो पसलसँगै जोडिएको सरू श्रेष्ठको फेन्सी पसलमा समेत फैलिएर क्षति पुर्याएको छ। क्षतिको यकिन विवरण हालसम्म खुल्न सकेको छैन।
नवलपरासी पूर्वको विनयी त्रिवेणी गाउँपालिका-२ त्रियासीमोडस्थित सडकमा सुनौलीबाट काठमाडौं जाँदै गरेको युपि ६५ इएक्स ६०३० नम्बरको कारमा आगलागी हुँदा कार पूर्ण रूपमा जलेर नष्ट भएको छ।
बारा जिल्लाको जितपुर सिमरा उपमहानगरपालिका-१६ सखुवाघाट लामा टोलमा सुरेश लामाको घर र गोठमा आगलागी हुँदा करिब १२ लाख रूपैयाँ बराबरको क्षति भएको छ।
यस्तै, सर्लाहीको बरहथवा नगरपालिका-७ तरकारी बजारमा ललन कुमार दासको घुम्ती पसलमा आगलागी हुँदा आंशिक क्षति भएको छ। आगोले सँगै रहेको कस्मेटिक पसलमा समेत क्षति पुर्याउँदै करिब १५ लाख रूपैयाँ बराबरको धनमाल जलेर नष्ट भएको छ।
पर्सा जिल्लाको वीरगञ्ज महानगरपालिका-२२ जगरनाथपुरमा बिगा राउतको खेतमा थुपारी राखिएको धानमा आगलागी हुँदा करिब ७ लाख रूपैयाँ बराबरको क्षति भएको छ।
आगलागी नियन्त्रणका लागि स्थानीय बासिन्दा, प्रहरी र दमकलले संयुक्त प्रयास गरेका थिए। प्रहरीका अनुसार आगलागीका सबै घटनामा आवश्यक अनुसन्धान भइरहेको छ।
तपाईको प्रतिक्रिया दिनुहोस