राजकुमार राव र श्रद्धा कपुर अभिनित बलिउडको हिट चलचित्र ‘स्त्री २’ ले बक्स अफिसमा नयाँ कीर्तिमान कायम गरेको छ। रिलिजको मात्र तेस्रो हप्तामा चलचित्रले ५०० करोड भारतीय रुपैयाँको मनग्गे व्यापार गरेको छ।

गत अगस्ट १५ मा रिलिज भएको यस चलचित्रको क्रेज अझै कम हुने संकेत देखिएको छैन। फिल्म विश्लेषकहरूले स्त्री २ ले आगामी दिनमा ६०० करोड भारतीय रुपैयाँको व्यापार गर्ने अनुमान गरेका छन्।

आइतबार मात्र २२.१० करोड भारतीय रुपैयाँ कमाउँदै स्त्री २ ले कुल ५०२.३५ करोड भारुको व्यापार गरिसकेको छ। यससँगै स्त्री २, पठान, जवान, गदर २, एनिमल र बाहुबली पछि ५०० करोड क्लबमा प्रवेश गर्ने छैटौँ भारतीय चलचित्र बनेको छ।

चलचित्रले पहिलो हप्तामा ३०७.८० करोड भारु कमाएको थियो भने दोस्रो हप्ता १४५.८० करोड कमाएको थियो। तेस्रो हप्तामा पनि चलचित्रले ४८.७५ करोड कमाउँदै दर्शकको मन जित्न सफल भएको छ।

कमर कौसिकद्वारा निर्देशित यस चलचित्रले अन्य दुई चलचित्रसँग प्रतिस्पर्धा गर्दा पनि बक्स अफिसमा आफ्नो दबदबा कायम राख्न सफल भएको छ। स्त्री २ को यो सफलताले बलिउडमा हरर कमेडीरको चलचित्रप्रतिको दर्शकको रुचिलाई प्रमाणित गरेको छ।