जापानका दुई ठूला अटोमोबाइल कम्पनी होन्डा र निसानबीच एकीकरण (मर्जर) गर्न प्रारम्भिक छलफल शुरू भएको छ। यो सम्भावित सम्झौताले टेस्ला लगायतका विद्युतीय सवारी साधन निर्माताहरूलाई चुनौती दिन रणनीतिक लाभ पुर्‍याउने अपेक्षा गरिएको छ।

दुवै कम्पनीले यसअघि विद्युतीय सवारी साधन निर्माणमा सहकार्यका लागि गत मार्चमा सहमति जनाएका थिए। यो वार्ता सोही सहकार्यलाई थप विस्तार गर्दै एकीकृत रूपमा प्रतिस्पर्धा गर्न तयार हुने दिशामा अघि बढेको विश्लेषकहरूले बताएका छन्।

होन्डाका प्रवक्ताले बुधबार एक वक्तव्यमा भने, "होन्डा र निसानबीच सम्भावित एकीकरणको सम्भावनाबारे प्रारम्भिक छलफल भइरहेको छ। यद्यपि, हालसम्म कुनै ठोस निर्णय गरिएको छैन।"

निसानले पनि सहकार्य र एकीकरणको सम्भावना खोजिरहेको पुष्टि गर्दै भनेको छ, “मार्चमा घोषणा गरेअनुसार, दुवै कम्पनीले दीर्घकालीन सहकार्यका लागि विभिन्न सम्भावनाहरू खोजिरहेका छन्। यदि कुनै ठोस अद्यावधिक निर्णय भयो भने, हामी उपयुक्त समयमा जानकारी गराउनेछौँ।”

विद्युतीय सवारी साधनको बजारमा टेस्ला र अन्य कम्पनीहरूको वर्चस्वलाई चुनौती दिन होन्डा र निसानको सम्भावित एकीकरण महत्त्वपूर्ण कदम हुनेछ। निसानले गत महिना ९,००० रोजगारी कटौतीको घोषणा गर्दै वार्षिक बिक्री लक्ष्य घटाएको थियो। आर्थिक चुनौतीहरूको सामना गर्न एकीकृत रणनीति आवश्यक रहेको कम्पनीहरूले स्वीकार गरेका छन्।

प्रारम्भिक छलफलको समाचारले शेयर बजारमा मिश्रित प्रभाव पारेको छ। बुधबारको कारोबारमा निसानको शेयर मूल्य २० प्रतिशतभन्दा बढीले वृद्धि भएको छ भने होन्डाको शेयर मूल्य एक प्रतिशतले घटेको छ। मित्सुबिशी मोटर्स, जुन निसानको साझेदार कम्पनी हो, को शेयर मूल्य पनि १४ प्रतिशतले बढेको छ।