अहिले सरकाको नेतृत्व गरिरहेको दल नेकपा एमालेको विद्यार्थी संगठन अनेरास्ववियु र देशको प्रमुख प्रतिपक्षदल नेकपा माओवादी केन्द्रको विद्यार्थी संगठन अखिल (क्रान्तिकारी) का नेता कार्यकर्ताविच सामाजिक संजाल फेसबुकमा सरकारको समर्थन र विरोधमा चर्को घोचपेच चलिरहेको छ ।

अनेरास्ववियु अध्यक्ष समिक बडालले केहि दिन देखि निरन्तर रुपमा माओवादी केन्द्रका अध्यक्ष प्रचण्ड विरुद्ध फेसबुकमा नानाथरीका पोष्टहरु लेखिरहेका छन् । उनले प्रचण्डकी नातिनी स्मिताको बिहेमा भारतीय प्रधानमन्त्री नरेन्द्र मोदीले शुभकामना सन्देश पठाएको प्रति पनि व्यङ्ग गरेका थिए ।

अध्यक्ष समिक बडालको गतिविधि प्रति माओवादी निकट अखिल क्रान्तिकारीका नेता कार्यकर्ताहरू आक्रोशित बनेका छन् ।

यसैविच अखिल क्रान्तिकारीका नवर्तमान केन्द्रीय सदस्य दियोजीत ओलीले फेसबुकमा एक पोष्ट गर्दै समिक बडालले धेरै चुरीफुरी गरे जिब्रो थुतेर फालिदिने भन्दै आक्रोश व्यक्त गरेका छन् । 

उनले भने "कमरेड समिक बडाल तपाई राजनैतिकरुपले आउनुहुन्छ भने ठिक छ यदि होइन भने  अनावश्यक प्रचण्डको बारेमा ब्याक बाइट गरे तपाइको जिब्रो थुतेर फाल्न क्रान्तिकारीहरू लामबद्द हुनेछन्" । ओलीको यो पोष्ट व्यापक रूपमा अखिल क्रान्तिकारीका नेता कार्यकर्ताहरूले शेयर गरिरहेका छन् ।

बौद्धिक स्तरबाट बहस हुनुपर्ने विद्यार्थी राजनीतिमा अहिले घम्साघम्सी चलिरहेको छ ।केही समय पहिले काठमाडौं महानगर प्रमुख बालेन शाहका बारेमा फेसबुकमा स्ट्याटस लेख्दा पनि अनेरास्ववियु अध्यक्ष समिक बडाल विवादीत बनेका थिए ।