धनगढीमा आयोजित ‘सुदूरपश्चिम महोत्सव’को १८ औँ संस्करण भोलिदेखि पुष २ गतेसम्म सञ्चालन हुने भएको छ। कैलाली उद्योग वाणिज्य सङ्घको आयोजनामा हुने महोत्सवले यस क्षेत्रको पर्यटन, कृषि, उद्योग, व्यापार, संस्कृति, र कलाको प्रवर्द्धनमा टेवा पुर्‍याउने उद्देश्य राखेको छ।

आज आयोजित पत्रकार सम्मेलनमा सङ्घका अध्यक्ष पुष्पराज कुँवरले महोत्सवका लागि आवश्यक सम्पूर्ण तयारी पूरा भइसकेको जानकारी दिनुभयो। महोत्सवस्थलमा स्टेज, स्टल, सचिवालय कक्ष, र प्रदर्शनी स्थलको निर्माण सम्पन्न भइसकेको छ।

महोत्सवले सुदूरपश्चिमका सम्भावनालाई उजागर गर्दै आर्थिक र सामाजिक चुनौतीबाट गुज्रिरहेको उद्योग व्यवसायलाई पुनःस्थापित गर्न मद्दत गर्ने अपेक्षा गरिएको छ। यस वर्षको महोत्सवमा विशेष रूपमा व्यावसायिक कृषि प्रदर्शनी र आधुनिक कृषि प्रविधिलाई प्रवर्द्धन गर्न जोड दिइने छ।

महोत्सव आयोजनामा करिब तीन करोड रुपैयाँ खर्च लाग्ने अनुमान गरिएको छ। यसैगरी, १५ करोड रुपैयाँबराबरको कारोबार हुने अपेक्षा गरिएको छ। आयोजकले महोत्सवमा पाँच लाख व्यक्तिले अवलोकन गर्ने लक्ष्य राखेका छन्।

महोत्सवमा कृषि, जडीबुटी, हस्तकला, फर्निचर, अटोमोबाइल, गारमेन्ट, इलेक्ट्रोनिकल, होटल, र सूचना प्रविधिसँग सम्बन्धित ५३१ वटा स्टल रहेका छन्। विद्यार्थीका लागि प्रवेश शुल्क ५० रुपैयाँ र अन्यका लागि १०० रुपैयाँ तोकिएको छ। ज्येष्ठ नागरिक र फरक क्षमता भएकाका लागि प्रवेश निःशुल्क छ।

महोत्सवको मुख्य प्रायोजक कृषि विकास बैंक हो भने संरक्षकका रूपमा नेपाल उद्योग वाणिज्य महासङ्घ र सुदूरपश्चिम प्रदेश सरकार रहेका छन्। स्थानीय तहका सबै निकायले प्रवर्द्धकका रूपमा सहयोग गरेका छन्। महोत्सवलाई व्यवस्थित गर्न मूल आयोजक समितिसहित २९ वटा उपसमिति गठन गरिएको छ।