देशभरका विभिन्न स्थानमा बुधबार राति भएका छुट्टाछुट्टै सवारी दुर्घटनामा सात जनाको ज्यान गएको छ भने केही घाइते भएका छन्।

काठमाडौं:
काठमाडौं महानगरपालिका-३२, जडिबुटीस्थित सडकमा बा.२० च १६०५ नम्बरको कार र लु.४८ प ७११० नम्बरको मोटरसाइकल ठोक्किँदा मोटरसाइकल चालक बुद्धिसागर चापागाईको मृत्यु भयो। गम्भीर घाइते भएका उनको उपचारका क्रममा ट्रमा सेन्टरमा निधन भएको हो।

जाजरकोट:
भेरी नगरपालिका-१०, नुवागाउँमा बोलेरो जिप सडकबाट करिब ७०० मिटर तल खस्दा चालक मनोज केसी र सवार मिथुन हमालको ज्यान गयो। घाइते एकजनाको नेपालगंजको नर्सिङ होममा उपचार भइरहेको छ।

सिराहा:
सिरहा नगरपालिका-११, भलुवाहीमा अटोको ठक्करबाट पैदलयात्री निरज कुमार कामतीको मृत्यु भयो। गम्भीर घाइते कामतीको उपचारका क्रममा प्रादेशिक अस्पतालमा निधन भयो। अटो चालक फरार छन्।

कपिलवस्तु:
कृष्णनगर नगरपालिका-१, मोडाहामा मोटरसाइकलको ठक्करले साइकलयात्री बिरदलाल नाउँको ज्यान गयो। दुर्घटनापछि मोटरसाइकल चालकलाई प्रहरीले नियन्त्रणमा लिएको छ।

नवलपरासी पूर्व:
गैंडाकोट नगरपालिका-४ मा मोटरसाइकल दुर्घटनामा पंकज ज्ञवालीको मृत्यु भयो। मोटरसाइकल अनियन्त्रित भई भएको दुर्घटनामा अन्य एक जना गम्भीर घाइते भएका छन्।

कैलाली:
लम्कीचुहा नगरपालिका-१० मा बसले मोटरसाइकललाई ठक्कर दिँदा एकतन चौधरीको ज्यान गयो। दुर्घटनामा मोटरसाइकलमा सवार एक जना गम्भीर घाइते छन्। बस चालकलाई प्रहरीले नियन्त्रणमा लिएको छ।

प्रहरीले सबै घटनाको अनुसन्धान गरिरहेको छ।