नेपाल विद्युत् प्राधिकरणले लाइन काटिएका उद्योगहरूमा पुनः विद्युत् लाइन जोड्न थालेको छ। प्राधिकरणको बोर्ड र मन्त्रिपरिषद्को निर्णयपछि प्राधिकरणले मातहतका कार्यालयहरूलाई उद्योगमा लाइन जोड्न निर्देशन दिइसकेको छ।

प्राधिकरणका प्रवक्ता चन्दनकुमार घोषका अनुसार मंगलबार राति ११ बजेदेखि विद्युत् लाइन पुनःजोड प्रक्रिया सुरु गरिएको हो। "हिजो राति ६ उद्योगमा लाइन जोडिएको थियो। अहिले थप उद्योगमा पनि लाइन जोड्न थालिएको छ र बिहानभर नै सबैमा लाइन जोडिनेछ," प्रवक्ता घोषले जानकारी दिएका छन्।

विद्युत् महसुल नबुझाएका कारण प्राधिकरणले कार्तिक ८ गते ३४ ठूला उद्योगहरूको लाइन काटेको थियो। सो निर्णयसँगै, महसुल किस्तामा बुझाउन सहमति भएका ६ उद्योगमा भने पहिल्यै लाइन जोडिएको थियो।