असोज दोस्रो साता आएको बाढीपहिरोले क्षतिग्रस्त बनाएको विपी राजमार्ग पुनःनिर्माणका लागि जापान अन्तर्राष्ट्रिय सहयोग नियोग (जाइका)को प्राविधिक टोलीले स्थलगत निरीक्षण सुरु गरेको छ। जाइकाको टोलीले कात्तिक दोस्रो साता र बिहीबार गरी दुईपटक अवलोकन गरेको डिभिजन सडक कार्यालय भक्तपुरले जनाएको छ।

डिभिजनका सिनियर डिभिजनल इन्जिनियर सुमन योगेशका अनुसार, जाइकाले आगामी डिसेम्बरको पहिलो हप्तासम्ममा पुनःनिर्माणसम्बन्धी प्रतिवेदन दिनेछ, त्यसपछि पुनःनिर्माण कार्य सुरु हुने अपेक्षा छ। नेपालको सडक विभागले समेत पुनःनिर्माणको तयारी गरिरहेको छ।

गत असोज ३० गते प्रधानमन्त्री केपी शर्मा ओलीले जापानी राजदूतसँग भेट गरी राजमार्ग पुनःनिर्माणमा सहयोगबारे छलफल गरेका थिए। जाइकाले पुनःनिर्माण नगरेमा दुई महिनाभित्र सडक कार्यालयले आफैँ पुनःनिर्माण कार्य अघि बढाउने बताइएको छ। प्रारम्भिक अनुमानअनुसार, पुनःनिर्माणमा झण्डै रु सात अर्ब लाग्नेछ।

धुलिखेल–सिन्धुली–बर्दिबास जोड्ने यस राजमार्गको चौकी डाँडादेखि सिन्धुलीसम्मका धेरै स्थानमा ठूलो क्षति पुगेको छ। हाल केही क्षेत्रमा अस्थायी संरचना निर्माण गरेर एकतर्फी सडक सञ्चालनमा ल्याइएको छ।

बाढीले २१ किलोमिटर सडकखण्डमा लगभग १० किलोमिटर सडक क्षतिग्रस्त बनाएको थियो। यो राजमार्ग नेपाललाई पूर्वी नेपालसँग जोड्ने छोटो र महत्त्वपूर्ण मार्ग मानिन्छ, र यसको पुनःनिर्माण दुई लेनको हुने बताइएको छ।