अमेरिकाको भर्जिनिया राज्यस्थित मनासस पार्कबाट  गत साउन १६ (जुलाई ३१) देखि हराइरहेकी २८ वर्षीया नेपाली नर्स ममता काफ्लेका पति नरेश भट्ट पक्राउ परेका छन् । उनी अगस्ट २ मा यूभीए हेल्थ प्रिन्स विलियम मेडिकल सेन्टरमा हाजिर नभएपछि सहकर्मीले स्थानीय प्रहरीलाई खबर गरेका थिए । प्रहरीले भट्टलाई पक्राउ गरेपछि उनको साथमा रहेकी एक वर्षीया छोरीलाई हेरचाह गृह लगिएको छ । प्रहरीले ममताको खोजीमा भर्जिनिया र अन्य अमेरिकी प्रहरी एजेन्सीलाई समेत सूचित गरेको छ ।

 ममताले साथीलाई भट्टसँग छुट्टिने तयारी गरिरहेको बताउने गरेकी थिइन् । ममता काफ्ले यसअघि पनि दुई–चार दिन सम्पर्कविहीन भएर फर्कने गरेकाले यो सामान्य घटना भएको भन्दै उनका पति नरेश भट्टले प्रहरीलाई फर्काइदिएका थिए1। सुरुमा प्रहरीमा उजुरी दिन नचाहेका भट्ट अगस्ट ५ मा प्रहरी कार्यालय पुगेका थिए । भट्ट दुई पटक अफगानिस्तान युद्धमा सहभागी भइसकेका अमेरिकी सेनाका अवकाश प्राप्त अधिकारी हुन् र हाल ह्वाइट हाउसमा कार्यरत छन् ।