३० वर्षे सेवा अवधिका आधारमा प्रहरी अधिकारीलाई अवकाश नदिन सर्वोच्च अदालतले अन्तरिम आदेश दिएको छ। आफूहरूलाई अन्यायपूर्वक अवकाश दिन लागिएको भन्दै  सरकारलाई विपक्षी बनाई पाँच एसएसपी, ६ एसपी, सात डिएसपी र तीन इन्स्पेक्टरले बुधबार रिट दायर गरेका हुन् ।२१ जना प्रहरी अधिकृतले बुधबार दायर गरेको रिटमा न्यायाधीश हरि फुँयालको इजलासबाट अन्तरिम आदेश जारी भएको हो । सर्वोच्च अदालतले ५० वर्षकै उमेरमा दक्षता हासिल गरेका अधिकृतलाई अवकाश दिँदा राज्यलाई आर्थिक भार पर्ने भन्दै दायर गरिएको रिटमा अन्तरिम आदेश जारी गरेको छ ।

यस आदेशले १५ भदौदेखि सेवा हदका कारण अवकाश पाउन लागेका करिब एक सय प्रहरी अधिकृतको जागिर लम्बिने भएको छ । अन्तिम निर्णय नहुँदासम्म उनीहरूलाई सेवाबाट अनिवार्य अवकाश दिने पत्रहरू कार्यान्वयन नगर्नू/नगराउनू र पूर्ववत् रूपमा आफ्नो पदीय कामकाज गर्न दिन नरोक्नू भन्ने आदेश भएको छ । यस रिटमा १० असोजमा पूर्ण सुनुवाइ हुनेछ ।