सुदूरपश्चिम प्रदेशका दुई जिल्लामा लामखुट्टेविरुद्ध प्रयोग हुने कीटनाशक विषादीको प्रभावकारिताबारे अध्ययन सुरु गरिएको छ। स्वास्थ्य निर्देशनालय राजपुर डोटीको कीट अनुसन्धान प्रयोगशालाले कैलाली र कञ्चनपुरमा यो अनुसन्धान गरिरहेको हो।

डेल्टामेथ्रिन, अल्फासाइपरमेथ्रिन र लैम्बडासायहेलोथ्रिन नामक तीन विषादी विगत २५ वर्षदेखि लामखुट्टेविरुद्ध प्रयोग हुँदै आएका छन्। स्वास्थ्य निर्देशनालयका कीटजन्य अधिकृत हेमराज जोशीका अनुसार, "माउथ एस्पिरेटरको माध्यबाट औलो प्रभावित क्षेत्रबाट लामखुट्टे संकलन गर्दैछौँ।"

अध्ययनका क्रममा १०० लामखुट्टेलाई विषादीसँग सम्पर्क गराउने र ५० लामखुट्टेलाई विषादी रहित ट्युबमा राखेर विश्लेषण गरिनेछ। विषादीसँग सम्पर्क गरिएका र नगरिएका लामखुट्टेको मृत्युदरको तुलना गरेर विषादीको प्रभावकारिता मूल्यांकन गरिनेछ।

पहिलो चरणमा कञ्चनपुरका भीमदत्त नगरपालिका–९ बाट अध्ययन सुरु गरिएको छ। एनोफिलिस फ्युवियाटिलिस लामखुट्टेलाई डेल्टामेथ्रिनसँग सम्पर्क गराएर परीक्षण गरिरहेको छ। दोस्रो चरणमा कैलालीका मलेरिया प्रभावित क्षेत्रमा अध्ययन गरिनेछ।

नेपालमा औलो फैलाउने मुख्य लामखुट्टे प्रजातिहरू एनोफिलिस फ्युवियाटिलिस, एनोफिलिस म्याकुलाटस कम्पलेक्स र एनोफिलिस एन्युलरिस रहेका छन्। सुदूरपश्चिममा औलोबाट प्रभावित हुने जोखिम उच्च रहेको छ, र आर्थिक वर्ष २०८०-८१ मा औलोका २ सय ४७ बिरामी र आयातित २ सय २९ बिरामीको संख्या रहेको छ।