नेपालले अमेरिकालाई १६५ रनको चुनौती दिएको छ। टि-२० सिरिजको क्रममा अमेरिकाको डालसस्थित ग्रान्ड पिएरे मैदानमा टस हारेर ब्याटिङ गर्न आएको नेपालले ९ विकेटको क्षतिमा १६४ रन बनाएको हो।

नेपालका ओपनर अनिल शाह र आशिफ शेखले समान २७ रन बनाए। शाहले १८ बलमा २ चौका र १ छक्का हिर्काए भने शेखले २७ बलमा चार चौका प्रहार गरे।

तेस्रोक्रममा रहेका कुशल भुर्तेल १३ बलमा १० रनमा आउट भए, जबकि आक्रामक खेल खेल्न थालेका गुल्सन झा ७ बलमा १ छक्का र १ चौका सहित ११ रनमा आउट भए।

नेपालका कप्तान रोहित पौडेल र दीपेन्द्रसिंह ऐरीले सम्हालिएर खेल्दै अमेरिकाविरुद्ध सम्मानजनक योगफल तयार पारे। कप्तान पौडेलले ३३ बल खेल्दै ४ चौका र १ छक्कासहित ४९ रन बनाए। उनले एक रनले अर्धशतक चुकाए। ऐरीले १७ बलमा २ चौका र १ छक्का सहित २८ रन जोडे। त्यसपछि कुनै पनि ब्याट्सम्यान टिक्न सकेनन्।

नेपालको ब्याटिङ १९ र २० ओभरमा ढालियो। करण केसी र आरिफ शेख शून्यमा आउट भए, जबकि सोमपाल कामीले मात्र २ रन जोड्न सके। अमेरिकाका सौरभ नेत्रावलकर, जसदीप सिङ र हरमित सिङले समान २-२ विकेट लिए।

अब १६५ रनको चुनौती पाएको अमेरिका केही बेरमा जवाफी ब्याटिङ गर्नेछ।