चर्चित पप ब्याण्ड ‘वन डाइरेक्शन’ का पूर्वसदस्य लियाम पेने ३१ वर्षको उमेरमा निधन भएको छ।

मिडिया रिपोर्टअनुसार, अर्जेन्टिनाको ब्यूनस आयर्सस्थित एक होटलको तेस्रो तल्लाबाट खस्नाका कारण उनकाे मृत्यु भएको हो। यो दुर्घटना पालेर्मोको कोस्टारिका स्ट्रिटमा रहेको होटलमा भएको जनाएको छ।

उनको निधनको समाचारले संगीत क्षेत्रमा शोकको लहर फैलाएको छ। यसै महिनामा उनले अर्जेन्टिनामा एक कन्सर्टमा प्रस्तुति दिएका थिए।

सन् २०१० मा युकेको रियालिटी शो ‘द एक्स फ्याक्टर’ मा सहभागी भएपछि लियाम पेने, जयान मालिक, ह्यारी स्टाइल, लौइस टमलिनसन र नियाल होरानले ‘वन डाइरेक्शन’ ब्याण्ड गठन गरेका थिए। यो ब्याण्ड २०१६ मा निष्क्रिय भएको थियो र यसले पाँच एल्बम निकालेको थियो। विशेषगरी, २०१३ मा आएको तेस्रो एल्बम "मिडनाइट मेमोरिज" विश्वभरि धेरै बिक्री भएको थियो।