.png)
बैतडी, २५ असोज : बैतडीका विभिन्न भगवती मन्दिरमा महाअष्टमीको जात्रा शान्तिपूर्ण रूपमा सम्पन्न भएको छ। घटस्थापनादेखि महाअष्टमीसम्मको समयमा यहाँका भगवती मन्दिरमा करिब एक हजार पशुबलि चढाइएको छ, जसले यस पर्वको धार्मिक महत्त्वलाई प्रकट गर्छ।
जिल्लाकै प्रसिद्ध निङ्गलाशैनी मन्दिरमा लागेको अष्टमी मेलामा मात्र पाँच सय १२ पशुको बलि दिइएको छ। दशरथचन्द नगरपालिका–२ स्थित निङ्गलाशैनी भगवती मन्दिरमा ३१७ राँगा र १९५ बोकाको बलि चढाइएको मेला व्यवस्थापन समितिका कोषाध्यक्ष मनोज बोहराले जानकारी दिनुभयो।
पाटन नगरपालिका–६ स्थित उदयदेव मन्दिरमा ३८ राँगा र १२ बोकाको बलि दिइएको छ। मेलौली नगरपालिकाको मेलौली भगवती मन्दिरमा घटस्थापनादेखि आजसम्म दुई सय २० पशुको बलि चढाइएको, जसमा एक सय राँगा र एक सय २० बोकाको बलि समावेश छ, मन्दिर व्यवस्थापन समितिका अध्यक्ष नरेश नायकले बताउनुभयो।
सुर्नया गाउँपालिका–५ स्थित फल्ङासैनी मन्दिरमा २१ वटा पशुको बलि दिइएको छ। बिहीबार राति १४ राँगा र सात बोकाको बलि चढाइएको, सो गाउँपालिकाका वडा नं ५ का वडाध्यक्ष केशवसिंह बिष्टले जानकारी दिनुभयो।
डिलासैनी गाउँपालिका–५ को कफलासैनी भगवती मन्दिरमा ६५ पशुको बलि चढाइएको, जसमा ३० वटा राँगा र ३५ वटा बोकाहरू छन्, वडा नं ५ का वडा अध्यक्ष यज्ञ भट्टले जानकारी दिनुभयो।
यसैगरी, डिलासैनी–६ को निङ्गलाशैनी भगवती मन्दिरमा २३ पशुको बलि दिइएको छ। पुर्चौडीका विभिन्न भगवती मन्दिरमा १२ राँगा र ४२ बोकाको बलि चढाइएको छ।
डिलासैनी–१ को दुर्गाभवानी मन्दिरमा नवरात्रिभर १८ बोकाको बलि दिइएको स्थानीय शिक्षक धर्मराज भट्टले जानकारी दिनुभयो।
दोगडाकेदार गाउँपालिका ३ सिल्लमा रहेको रणशैनी भगवती मन्दिरमा २६ राँगा र ३२ बोकाको बलि दिइएको मेला व्यवस्थापन समिति सदस्य जनक चन्दले बताउनुभयो।
यहाँका मन्दिरमा लाग्ने जात्रामा छिमेकी राष्ट्र भारतका दर्शनार्थीहरू पनि आउने गरेका छन्। बैतडीका प्रहरी प्रमुख, प्रहरी नायव उपरीक्षक मकेन्द्र कुमार मिश्रले भगवतीका मन्दिरमा सम्पन्न जात्रा शान्तिपूर्ण रूपमा सम्पन्न भएको जानकारी दिएका छन्।
महाअष्टमीको अवसरमा यहाँका मन्दिरहरूमा चहलपहल देखिएको थियो र भक्तजनले भव्य ढंगले देवीको पूजा अर्चना गर्दै पशुबलि चढाउने परम्परा जारी राखेका छन्।
तपाईको प्रतिक्रिया दिनुहोस