प्रधानमन्त्री केपी शर्मा ओलीले विकास निर्माणमा सामान्य सुधारभन्दा आमूल परिवर्तनको आवश्यकता रहेको बताएका छन्। उनले लगानी बोर्डको ५९औं बैठकमा काममा ढिलाइ, कानुनी र व्यवहारिक जटिलताको अन्त्य गर्न आग्रह गरे।

“हामीले सामान्य सुधार होइन, रूपान्तरण गर्नुपर्छ। पुराना कानुन संशोधन र टालटुल गरेर अब चल्दैन,” प्रधानमन्त्री ओलीले भने। उनले बोर्डलाई विज्ञ, युवा, र ऊर्जावान् जनशक्तिसहित सबलीकरण गर्नुपर्ने पनि जोड दिए।

प्रधानमन्त्रीले कार्यप्रवाहमा ट्रयाकिङ प्रणाली कार्यान्वयन गर्ने र फाइल सम्बन्धित कार्यालयमा आएको तीन दिनभित्र निर्णय हुने व्यवस्था गर्नुपर्ने बताए। बैठकमा बोर्डका प्रमुख कार्यकारी अधिकृत सुशील ज्ञवालीले आगामी चार वर्षका लागि रणनीतिक र व्यावसायिक कार्ययोजनाको सैद्धान्तिक स्वीकृति पाएका थिए।

बोर्डले निजी क्षेत्र र प्रत्यक्ष वैदेशिक लगानीमा वृद्धि गर्नुपर्ने, एकल विन्दु सेवा केन्द्रलाई कार्यान्वयनमा ल्याउनुपर्ने, र विद्यमान कानुनमा संशोधन गरी स्वायत्तता दिनुपर्नेमा जोड दिएको छ।

बैठकले चालु आर्थिक वर्षका लागि १८ करोड ८३ लाख बजेट र प्रमुख कार्यकारी अधिकृतको कार्यसम्पादन सम्झौतासमेत स्वीकृत गर्यो।